“AZƏRBAYCAN HAVA YOLLARI” DÖVLƏT KONSERNİNİN BAŞ DİREKTORU CAHANGİR ƏSGƏROVUN ÇIXIŞI
Əziz gəncəlilər,
Xanımlar və cənablar!
“Gəncəni sənaye şəhəri etmək, Gəncəni daha da böyük etmək, Gəncə sakinlərinin həyat tərzini yaxşılaşdırmaq həmişə Azərbaycan rəhbərliyinin diqqət mərkəzində olmuşdur”. Ümummilli liderimiz Heydər Əliyevin bu sözləri artıq reallıqdır. Həqiqətən, zəngin tarixi olan Gəncə böyüyür, gözəlləşir və yeni tikililər şəhərə xüsusi yaraşıq verir. Yenidən qurulan Gəncə beynəlxalq hava limanı isə öz əzəmətli görünüşü və müasirliyi ilə bu qədim şəhərdə daha çox seçilir. Azərbaycanın ikinci böyük şəhəri olan Gəncədə, Nizami yurdunda biz tarixi bir hadisənin şahidi oluruq. Beynəlxalq standartlar səviyyəsində qurulan Gəncə hava limanı bu gün istifadəyə verilir. Bu münasibətlə sizi səmimi qəlbdən təbrik edirəm.
Hörmətli mərasim iştirakçıları, yenidən qurulmuş Gəncə hava limanı tanınmaz dərəcədə dəyişmişdir. Beynəlxalq standartlar səviyyəsində tikilmiş, uzunluğu 3300 metr olan uçuş-enmə zolağı dünyada istismar olunan ən ağır tipli təyyarələri qəbul etməyə imkan verəcəkdir. Gəncə hava limanı ölkəmizdə beynəlxalq statusu olan üçüncü hava limanıdır.
Ümummilli liderimiz Heydər Əliyevin bütün dövrlərdə mülki aviasiyamızda həyata keçirdiyi böyük işləri bu gün möhtərəm Prezidentimiz cənab İlham Əliyev uğurla tamamlayır və irəli aparır. 2004-cü ildə Bakıda yerli hava xətləri aerovağzal binasının, 2004-cü ildə Naxçıvan hava limanının, 2005-ci ildə Heydər Əliyev adına beynəlxalq hava limanında möhtəşəm yük terminalının, bu gün isə dünya standartlarına uyğun olan Gəncə hava limanının istifadəyə verilməsi buna əyani sübutdur.
Eyni zamanda, son illər mülki aviasiyamızın aviaparkı “Boinq” və “Aerobus” tipli sərnişin, “İl-76” yük təyyarələri, “Super Puma” və “Delfin Hyuz” vertolyotları hesabına təzələnmişdir. Onu da xatırlatmaq istərdim ki, 2006-cı ilin 2 iyulu önəmli bir gün kimi mülki aviasiyamızın tarixində həmişə qalacaqdır. Çünki Azərbaycan Prezidenti cənab İlham Əliyevin Sərəncamı ilə ilk dəfə olaraq, öz peşə bayramımızı məhz həmin gün qeyd etmişik. Bundan sonra hər il iyul ayının 2-də peşə bayramımızın sevincini yenidən yaşayacağıq.
Möhtərəm cənab Prezident!
Hörmətli mərasim iştirakçıları!
Gördüyünüz kimi, Gəncə beynəlxalq hava limanı tamamilə dəyişmiş, tanınmaz olmuşdur. Sahəsi 15 min kvadratmetrdən çox olan üçmərtəbəli aerovağzal binası, hava daşımalarının təşkili və həyata keçirilməsi üçün sahəsi 2 min kvadratmetr olan yük terminalı, sahəsi 100 min kvadratmetr olan yeni asfalt-beton örtüklü perron, 80 min kvadratmetr sahədə yönəldici yol, aeroportun perimetri boyu 20 kilometr mühafizə hasarı, nəzarət-buraxılış məntəqələri, transformator stansiyası, yanacaqdoldurma məntəqəsi, yanğınsöndürmə binası və başqa mühüm obyektlər inşa olunmuşdur. Aerodrom ərazisində 400 min kvadratmetr sahədə asfalt-beton döşənmişdir. Aerovağzaldan Gəncə-Qazax magistralına qədər uzunluğu 3 kilometr, sahəsi isə 55 min kvadratmetr asfalt-beton yolun tikintisi tamamlanmışdır.
Möhtərəm cənab Prezident!
Sizə bildirmək istərdim ki, Gəncə hava limanının yenidən qurulması layihəsinin başa çatması nəticəsində burada 200-dən çox yeni daimi iş yeri açılmışdır. Regionların sosial-iqtisadi inkişafı Dövlət proqramına uyğun olaraq isə, son üç ildə mülki aviasiyamızda mindən çox yeni iş yeri yaradılmışdır.
Möhtərəm cənab Prezident!
Hava limanının yenidən qurulması layihəsi çərçivəsində çox böyük tikinti proqramı yerinə yetirilmişdir. Sizin göstərişinizlə aeroport ərazisindəki bütün köhnə tikililər sökülmüş, əslində, çöllükdə, tamamilə boş yerdə yeni hava limanı inşa edilmişdir. Bütün obyektlərdə tikinti işləri çox keyfiyyətli və beynəlxalq standartlara uyğun aparılmışdır. Ona görə bu layihəni həyata keçirən “Azvirt”, “Zema” inşaat şirkətlərinə və digər tikinti-quraşdırma təşkilatlarına, burada çalışan bütün inşaatçılara, qardaş Türkiyənin və başqa ölkələrin mütəxəssislərinə minnətdarlığımı və təşəkkürümü bildirirəm.
Möhtərəm cənab Prezident!
İcazə verin, Sizi əmin edim ki, Azərbaycanın tərəqqisi və inkişafı naminə qarşıya qoyduğunuz mühüm vəzifələrin yerinə yetirilməsində biz aviatorlar bundan sonra da var qüvvə ilə çalışacaq, təhlükəsiz uçuşlar həyata keçirməklə daha böyük uğurlar qazanacağıq.
Möhtərəm cənab Prezident!
Bu gün bir daha bəyan edirəm ki, “Azərbaycan Hava Yolları” Dövlət Konserninin çoxminlik kollektivi Azərbaycan Respublikasının Prezidenti kimi Sizin xarici siyasətinizi ürəkdən bəyənir və dəstəkləyir. Biz aviatorlar Azərbaycan dövlətinə və dövlətçiliyinə həmişə sadiq olacağıq.
Yaşasın möhtərəm Prezidentimiz cənab İlham Əliyev!
Yaşasın müstəqil Azərbaycan!
X X X
Prezident İlham Əliyev mərasimdə nitq söylədi.
Bölmənin digər xəbərləri
