Azərbaycan İpək Yolu Beynəlxalq Sərgisində “Fəxri qonaq ölkə” statusunda iştirak edəcək
Pekin, 14 noyabr, AZƏRTAC
Çinin Şansi vilayətinin paytaxtı Sian şəhərində 7-ci İpək Yolu Beynəlxalq Sərgisi keçiriləcək.
AZƏRTAC xəbər verir ki, Çin Milli İnkişaf və İslahat Komissiyasının, Kommersiya Nazirliyinin və Şansi vilayət hökumətinin birgə təşkilatçılığı ilə keçirilən tədbirdə İpək Yolu üzərində yerləşən ölkələr arasında ticarətin inkişafı, dövlətlərin ticari əlaqələrinin genişləndirilməsi, yeni ticarət növlərinin tətbiqi məsələləri diqqət mərkəzində olacaq. Azərbaycan sərgidə “Fəxri qonaq ölkə” statusunda iştirak edəcək. Tədbir çərçivəsində Azərbaycan ilə Çin arasında iqtisadi-ticarət, mədəni və turizm əməkdaşlığına dair təqdimat olacaq.
Sərginin ekspozisiya bölməsində Azərbaycan stendində ölkəmizin investisiya, nəqliyyat-logistika və turizm potensialı nümayiş olunacaq. Stendimizi ziyarət edənlərə Qarabağ və Şərqi Zəngəzur iqtisadi rayonlarında, Ələt Azad İqtisadi Zonasında (AFEZ), İqtisadi Zonaların İnkişafı Agentliyinin (İZİA) sənaye parklarında verilən imtiyazlar, İxracın və İnvestisiyaların Təşviqi Agentliyinin (AZPROMO) və Dördüncü Sənaye İnqilabının Təhlili və Koordinasiya Mərkəzinin investorlara göstərdiyi xidmətlərə dair məlumatlar veriləcək. Ölkə stendində “Made in Azerbaijan” brendi altında istehsal olunan məhsullar nümayiş olunacaq, alkoqollu və alkoqolsuz içkilərin dequstasiyası keçiriləcək.
AZƏRTAC-ın xüsusi müxbiri
Pekin
Bölmənin digər xəbərləri
