AZƏRBAYCAN İPOTEKA FONDUNUN İPOTEKA KREDİTLƏRİ ÜZRƏ KOTİROVKA DƏRƏCƏSİ 2 FAİZƏ ENDİRİLMİŞDİR

16.11.2006 [17:57]
Çap et
A⁺ A^-

Milli Bankın idarə heyətinin qərarı ilə ipoteka kreditlərinin alınmasının daha da kütləviləşməsi və əhalinin daha geniş təbəqələrinin bu maliyyə xidmətindən istifadə etməsi üçün noyabrın 20-dən etibarən ipoteka kreditlərinin yenidən maliyyələşdirilməsi üzrə Azərbaycan İpoteka Fondunun kotirovka dərəcəsi 2 (iki) faiz səviyyəsində müəyyən edilmişdir.

Azərbaycan İpoteka Fondundan AZƏRTAC-a bildirmişlər ki, Azərbaycan Prezidentinin 2005-ci il 22 dekabr tarixli Fərmanı ilə təsdiq olunmuş “Azərbaycan Respublikasının Milli Bankı nəzdində Azərbaycan İpoteka Fondunun vəsaiti hesabına ipoteka kreditlərinin verilməsi Qaydaları”na əsasən, ipoteka kreditlərinin yenidən maliyyələşdirilməsi üzrə Azərbaycan İpoteka Fondunun kotirovka dərəcəsi, habelə müvəkkil kredit təşkilatlarının markası maksimum 6 faiz səviyyəsində müəyyənləşdirilmişdir.

Bu gunədək verilmiş ipoteka kreditləri üzrə orta statistik faiz dərəcəsi 9,7 faiz təşkil etmişdir.