Azərbaycan karateçiləri İspaniyada keçiriləcək dünya çempionatında iştirak edəcəklər
Bakı, 30 oktyabr (AZƏRTAC). Yeniyetmə və gənclərdən ibarət karate üzrə Azərbaycan milli komandası dünya çempionatına son hazırlıqları davam etdirir.
Azərbaycan Milli Karate Federasiyasından AZƏRTAC-a bildirmişlər ki, İspaniyanın Quadalahara şəhərində 8-ci mundialda 13 idmançıdan ibarət heyət qüvvəsini sınayacaqdır. Milli komandamızın üzvləri kata və kumite yarışlarında çıxış edəcəklər.
Şahin Xudaverdiyev, Anar Allahverdiyev və Rafael Ağayevdən ibarət məşqçilər korpusu dünya çempionatında yeniyetmələrdən İlqar Hüseynzadə (52 kq, kumite), Cavid Qəniyev (57 kq, kumite), İsa Məmmədov (63 kq, kumite), Fəridə Əliyeva (54 kq-dan yuxarı, kumite) və Roman Heydərova (kata) şans verəcəklər.
On altı, on yeddi yaşlı idmançıların mübarizəsində Azərbaycanı Ülvi Qurbanov (55 kq, kumite), Hüseyin Əliyev (61 kq, kumite), Muraz Atakişiyev (68 kq-dan yuxarı, kumite), Asiya Məlikova (48 kq, kumite) və Aytac Əliyeva (53 kq-dan yuxarı, kumite) təmsil edəcəklər.
Gənclərdən ibarət komandanın heyətində isə Tural Ağazadə (68 kq-dan yuxarı, kumite), Şahin Quluzadə (78 kq, kumite), Pənah Abdullayev (78 kq-dan yuxarı, kumite) və Tural Balcanlı (kata) yer almışlar.
İspaniyada iştirak edəcək komandamıza Azərbaycan Milli Karate Federasiyasının prezidenti, yeddi dan qara kəmər sahibi Yaşar Bəşirov rəhbərlik edəcəkdir. Mundialın hakimləri arasında beynəlxalq dərəcəli referilərimiz Yusif Məmmədov, Cahangir Babayev, Ranat Əliyev, Vüqar Kərimov və Nərgiz Mehdiyeva da yer alacaqlar. Hakimlər milli komandanın üzvlərindən 5 gün əvvəl yarışa gedəcəklər. Dünya çempionatına noyabrın 5-də yola düşən karateçilərimiz altı gün sonra Vətənə dönəcəklər.
Bölmənin digər xəbərləri
