AZƏRBAYCAN KİYEVDƏ QİƏT PA KOMİTƏSİNİN İCLASINDA SƏDRLİK EDİR
Aprelin 16-də Ukrayna Ali Radasının konfrans salonunda Qara Dəniz İqtisadi Əməkdaşlıq Təşkilatı Parlament Assambleyasının (QİƏT PA) Mədəniyyət, təhsil və sosial məsələlər komitəsinin 20-ci iclası başlanmışdır.
Forumda sədrlik edən Milli Məclisin deputatı Şaitdin Əliyev giriş sözündə qonaqpərvərliyə və tədbirin iştirakçıları üçün gözəl iş şəraiti yaradıldığına görə Ukrayna parlamentinin sədri V.Litvinə və bu ölkənin QİƏT PA-dakı milli nümayəndə heyətinin başçısı O.Salminə dərin minnətdarlığını bildirdi. O, cari ildə QİƏT PA-nın onilliyini qeyd etdiyini və 1993-cü il fevralın 26-da çox mühüm bir sənəd - İstanbul bəyannaməsi imzalandığını xatırlatdı. Ş.Əliyev dedi ki, QİƏT PA Qara dəniz regionunu sabitlik, sülh və iqtisadi əməkdaşlıq zonasına çevirmək sahəsində əməli mexanizmdir. O, Azərbaycan tərəfinin bu sahədə, eləcə də intellektual və mədəni mübadilə sahəsində mühüm rol oynadığını vurğuladı.
Sonra Ukrayna Ali Radasının sədri V.Litvinə söz verildi.
İclasın gündəliyinə mühüm məsələlər, vacib problemlər daxildir. Onların arasında “Qara dəniz İqtisadi Əməkdaşlıq Təşkilatı regionunun inkişafında mədəniyyətin rolu” haqqında tövsiyələr layihəsi də var. Onu QİƏT PA Regional Siyasət Komitəsi sədrinin müavini Ş.Əliyev iclasın birinci günü təklif etmişdir. İki gün davam edəcək iclasın iştirakçıları Ukrayna Prezidenti L.Kuçma və ölkənin baş naziri V.Yanukoviç tərəfindən qəbul olunacaqlar.
Azərbaycanın Ukraynadakı səfiri Tələt Əliyev iclasda iştirak edirdi.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
