Azərbaycan kuboku: "Zirə" klubu "Səbail"i böyük hesabla məğlub edib
Bakı, 2 fevral, Nicat Məmmədov, AZƏRTAC
Fevralın 2-də futbol üzrə Azərbaycan Kubokunda dörddəbir final mərhələsinin daha bir oyunu keçirilib.
AZƏRTAC xəbər verir ki, günün ilk matçında "Zirə" klubu "Səbail" komandasını qəbul edib. Zirə İdman Kompleksinin stadionunda baş tutan görüş meydan sahiblərinin 4:0 hesablı qələbəsi ilə yekunlaşıb.
Matçda ilk qolu birinci hissənin əsas vaxtına əlavə edilmiş 2-ci dəqiqədə Məhəmməd Hamdaui vurub. Görüşün 59-cu dəqiqəsində Loris Bronyo fərqi iki topa çatdırıb. Qarşılaşmanın 72-ci dəqiqəsində "Zirə"nin yeni transferi Hamidu Keyta qonaqları 3-cü dəfə məyus edib. Son nöqtəni isə 86-cı dəqiqədə Bronyo qoyub. Rəşad Sadıqovun baş məşqçi olduğu kollektiv bu nəticə ilə cütün taleyini böyük ölçüdə həll edib.
Komandalar arasında cavab qarşılaşması fevralın 13-də oynanılacaq.
Dörddəbir finalın ilk oyunlarına hazırda davam edən "Sumqayıt" - "Qəbələ" matçı ilə yekun vurulacaq.
Qeyd edək ki, bu raundun ötən gün keçirilmiş matçlarında "Qarabağ" evdə "Keşlə"yə 1:0 hesabı ilə qalib gəlib, "Neftçi" isə "Sabah"la heç-heçə edib - 1:1.
Bölmənin digər xəbərləri
