AZƏRBAYCAN MƏKTƏBLİLƏRİ FRANSIZ DİLİNİ ÖYRƏNİRLƏR

25.04.2006 [20:52]
Çap et
A⁺ A^-

AZƏRTAC xəbər verir ki, aprelin 25-də məktəblilər arasında “Mən fransız dilində danışıram” respublika müsabiqəsinin növbəti mərhələsi olmuşdur. Müsabiqəni Fransanın “Total” şirkətinin ölkəmizdəki nümayəndəliyinin sponsor dəstəyi ilə “Kainat” Gənclik Mərkəzi təşkil etmişdir.

Mərkəzin direktoru Rahib Rəsulzadə bildirmişdir ki, orta məktəb şagirdlərinin iki yaş qrupu arasında keçirilən fransız dili müsabiqəsi son illər ənənəyə çevrilmişdir. Belə müsabiqələr xarici dilləri öyrənən məktəbliləri daha da ruhlandırır.

Məktəblilərin biliyinin yoxlanılmasında Bakıdakı Fransa Mədəniyyət Mərkəzinin başçısı Azelma Həsənova, Mərkəzin əməkdaşı Kəmalə Əhmədova, fransalı pedaqoq Madlen Büss, Bezanson Universitetinin məzunu Naidə Məmmədova, Fransada təhsil alan iki azərbaycanlı tələbə iştirak etmişlər.

Müsabiqənin bütün iştirakçıları fəxri diplomlara layiq görülmüş, hər iki yaş qrupunda qaliblər (cəmi 11 nəfər) xatirə hədiyyələri almışlar.