Milli Məclisin AŞPA-dakı daimi nümayəndə heyətinin rəhbəri İlham Əliyevin başçılığı ilə deputat qrupunun üzvləri - S.Seyidov, V.Vəkilov, N.Şahtaxtinskaya, G.Hacıyeva, R.Hüseynov, N.İbrahimov, Q.Əlibəyli, Ə.Hüseynov, habelə Milli Məclis Aparatının beynəlxalq münasibətlər şöbəsinin müdiri A.Qasımov, deputat E. Məmmədov, Şuşa rayonu icra hakimiyyətinin başçısı, Dağlıq Qarabağın azərbaycanlı icmasının rəhbəri N. Bəhmənov, icra başçısının Şuşa şəhəri üzrə nümayəndəsi V. Hüseynov, Şuşa şəhəri 1 nömrəli məktəbin direktoru S. Babayeva Strasburqa gəlmişlər. 

AŞPA-nın yay sessiyasının gündəliyinə insan həyatı üçün ciddi təhlükə yaradan tütün istehsalına qarşı mübarizə, Şimali Amerikada qadınların vəziyyəti, beynəlxalq idarəçiliyə parlament nəzarəti, Yuqoslaviya, Azərbaycan, Gürcüstan və Ermənistanda qaçqın və məcburi köçkünlərin vəziyyəti, kimyəvi silahlardan istifadənin ətraf mühitə təsiri və digər məsələlər daxildir.

X X X

İyunun 24-də Azərbaycan nümayəndə heyətinin rəhbəri İlham Əliyev və Dağlıq Qarabağın azərbaycanlı icmasının təmsilçiləri Avropa Şurasının baş katibi Valter Şvimmerlə görüşmüşlər.

Görüş zamanı nümayəndə heyətinin başçısı İ.Əliyev Ermənistanın Azərbaycana qarşı təcavüzü nəticəsində torpaqlarımızın 20 faizinin - Dağlıq Qarabağın və onun ətrafındakı 7 rayonun Ermənistan silahlı qüvvələri tərəfindən işğal olunması, ölkəmizin 1 milyondan artıq qaçqın və məcburi köçkün problemi ilə üzləşməsi, onların çətin şəraitdə yaşaması barədə ətraflı məlumat vermiş və AŞ-nin öz nüfuzundan istifadə edərək, Ermənistan-Azərbaycan münaqişəsinin tezliklə sülh yolu ilə həllinə kömək göstərməsini xahiş etmişdir.

Nizami Bəhmənov Ermənistanın AŞ-na üzv olarkən götürdüyü öhdəliklərə əməl etməyərək, işğal altında saxladığı torpaqları azad etməməsindən ciddi narahat olduğunu bildirmiş, çadır şəhərciklərində məskunlaşmış qaçqın və köçkünlərin dözülməz şəraitdə yaşadığından söhbət açmış, AŞ-nin bütün imkanlarından istifadə etməklə Ermənistana təzyiq göstərilməsini xahiş etmişdir.

Cənab Valter Şvimmer nümayəndə heyətimizin rəhbəri İlham Əliyevin fikirləri ilə razılaşdığını bildirərək, Ermənistan-Azərbaycan münaqişəsindən, təkcə Azərbaycanda deyil, həm də digər Avropa ölkələrindəki qaçqın və məcburi köçkünlərin vəziyyətindən AŞ-nin ciddi narahat olduğunu söyləmiş, Dağlıq Qarabağ münaqişəsinin tezliklə sülh yolu ilə həll edilməsində maraqlı olduğunu vurğulamışdır.

Milli Məclisin nümayəndə heyətinin rəhbəri İlham Əliyevin Azərbaycanda və ümumiyyətlə, beynəlxalq aləmdə artıq böyük nüfuza malik olduğunu vurğulayan AŞ-nin baş katibinin fikrincə, kommunikasiyaların açılması münaqişənin tezliklə həllində irəliyə doğru addım olardı.

İlham Əliyev bu məsələdə ölkəmizin qəti mövqeyini ifadə edərək, Ermənistanla Azərbaycan arasında kommunikasiyaların açılmasının yalnız işğal altındakı ərazilərin azad edilməsindən mümkün ola biləcəyini bildirmiş və demişdir ki, Ermənistan həmin əraziləri azad etməyincə bu barədə heç bir danışıq aparılmayacaqdır.

X X X

X X X

Həmin gün Azərbaycan nümayəndə heyətinin rəhbəri, Milli Məclisin deputatı İlham Əliyev və Dağlıq Qarabağın azərbaycanlı icmasının üzvləri Avropa Şurasının insan hüquqları üzrə komissarı Alvero Xil-Robleslə görüşmüşlər.

İlham Əliyev Ermənistan-Azərbaycan, Dağlıq Qarabağ münaqişəsinin ölkəmiz üçün ağır nəticələri, XX əsrin ən böyük faciələrindən olan Xocalı qırğını, bu soyqırıma başçılıq etmiş şəxslərin hazırda qondarma “Dağlıq Qarabağ Respublikası”nda rəhbər vəzifələrdə çalışması barədə məlumat vermişdir.

Dağlıq Qarabağın azərbaycanlı icmasının üzvləri Elman Məmmədov və Vaqif Hüseynov Azərbaycan nümayəndə heyətinin rəhbəri İlham Əliyevin AŞ kimi mötəbər təşkilatın rəhbərliyi ilə onların görüşünün təşkili üçün şəxsi təşəbbüs göstərməsini yüksək qiymətləndirmişlər. Onlar vurğulamışlar ki, insan hüquqları komissarının səlahiyyətləri bir o qədər geniş olmasa da, Ermənistanın işğalçılıq siyasətinə münasibət bildirmək, 1 milyondan artıq qaçqın-köçkün insanın hüquqlarının qorunması ilə maraqlanmaq onun bilavasitə işidir. Bildirilmişdir ki, Ermənistan işğalçılığı dövlət siyasəti səviyyəsinə qaldırmışdır. “Dənizdən dənizə uzanan Ermənistan imperiyası” yaratmaq xülyasına düşmüş ermənilərin bu siyasətinə son qoyulmalıdır.

Görüşdə nümayəndələr Xocalı soyqırımını ətraflı açıqlayaraq bildirmişlər ki, bu faciəyə indiyə qədər beynəlxalq səviyyədə siyasi qiymət verilməməsi, qondarma “Dağlıq Qarabağ Respublikası”nın rəhbərlərinin hərbi canilər kimi məsuliyyətə cəlb edilməməsi Xocalı camaatının ciddi narazılığına səbəb olmuşdur. Bu məsələyə komissar xüsusi diqqət yetirməli, xocalılıların xahişini nəzərə alaraq, məsələni AŞPA-nın sessiyalarının birində ətraflı müzakirə etməlidir.

Azərbaycan nümayəndə heyətinin başçısı İlham Əliyev demişdir ki, ermənilərin tutduğu qeyri-konstruktiv mövqe nəticəsində Minsk qrupunun xətti ilə aparılmış danışıqlar bu günə qədər müsbət nəticə verməmişdir. Hər iki dövlətin üzv olduğu Avropa Şurası Ermənistan-Azərbaycan, Dağlıq Qarabağ münaqişəsinə öz münasibətini bildirməli və Ermənistandan işğal olunmuş ərazilərdən tezliklə çıxmağı tələb etməlidir.

Daha sonra İlham Əliyev humanitar təşkilatların qaçqın və məcburi köçkünlərə göstərdiyi yardımı azaltmasından danışmış, komissardan xahiş etmişdir ki, öz nüfuzundan istifadə edərək, yardımın davam etdirilməsi və artırılması üçün humanitar təşkilatlarla təmasda olsun, bu məsələnin Azərbaycandan ötrü xüsusi əhəmiyyətini onların diqqətinə çatdırsın. Avropa Şurası 1 milyondan artıq qaçqın və məcburi köçkünün problemlərinə ciddi diqqət yetirməlidir.

Cənab Alvero Xil-Robles komissarın, əsasən, insan hüquqları ilə məşğul olduğunu xatırlatmış, siyasi danışıqlara müdaxilə edə bilməsə də, məsələnin həllini nəzarətdə saxlayıb müəyyən kömək göstərəcəyini, qaçqın və məcburi köçkünlərin vəziyyətlərinin yaxşılaşması sahəsində səylərini artıracağını vurğulamışdır. O demişdir ki, bu problemlə bağlı sentyabr ayında Bakıda seminar keçiriləcək və həmin müddətdə çadır şəhərciklərinə gedərək vəziyyətlə yaxından tanış olacaqdır.

Əsgər Əliyev

AZƏRTAC-ın xüsusi müxbiri

STRASBURQ