AZƏRBAYCAN PREZİDENTİ İLHAM ƏLİYEV ABŞ-IN DÖVLƏT KATİBİ MÜAVİNİNİN MƏSUL NÜMAYƏNDƏSİNİ QƏBUL ETMİŞDİR
Qonağı səmimiyyətlə salamlayan Prezident İLHAM ƏLİYEV dedi:
-Hörmətli cənab Linn Pasko, mən sizi ürəkdən salamlayıram. Azərbaycana xoş gəlmisiniz!
Amerika ilə Azərbaycan arasında münasibətlər uğurla inkişaf edir. Biz bütün sahələrdə çox uğurlu əməkdaşlıq edirik. Əminəm ki, bu əməkdaşlıq gələcəkdə də davam edəcəkdir. İqtisadi sahədə bu əməkdaşlıq artıq böyük uğurlar gətiribdir. Amerika dövlətinin dəstəyi ilə Azərbaycanda və regionda beynəlxalq aləm üçün çox böyük əhəmiyyəti olan irimiqyaslı enerji layihələri həyata keçirilir.
Bilirsiniz ki, beynəlxalq maliyyə qurumları, Beynəlxalq Maliyyə Korporasiyası, Avropa Bankı Bakı-Tbilisi-Ceyhan neft kəmərinin tikintisi üçün müvafiq vəsait ayırıbdır. Nəzərə alsaq ki, Amerika dövlətinin, xüsusilə, Dünya Bankında və Beynəlxalq Maliyyə Korporasiyasında nüfuzu çox güclüdür, ehtimal irəli sürmək olar ki, bu qurumlar layihəyə müvafiq vəsaiti Amerika hökumətinin növbəti dəstəyi ilə ayırıblar.
Digər sahələrdə də, o cümlədən terrorizmə qarşı mübarizədə ikitərəfli münasibətlərimiz yüksək səviyyədədir. Azərbaycan artıq açıq-aydın göstərib ki, çox etibarlı tərəfdaşdır. Prezident cənab Buş mənə göndərdiyi məktubda vurğulayır ki, Azərbaycan Amerika üçün dost ölkədir. Bu, həqiqətən də belədir. Siz bilirsiniz ki, Amerika da Azərbaycan üçün dost ölkədir. Əminəm ki, bu dostluq gələcəkdə də davam edəcəkdir və bizim ölkələrimizi bir-birinə daha da sıx bağlayacaqdır.
Səmimi qəbula görə Azərbaycan dövlətinin başçısına dərin minnətdarlığını bildirən ABŞ-ın Dövlət katibi müavininin məsul nümayəndəsi LİNN PASKO dedi:
-Cənab Prezident, vaxt ayırıb məni qəbul etdiyinizə görə, dərin minnətdarlığımı bildirirəm. İcazə verin, Amerika Birləşmiş Ştatlarının Prezidenti cənab Buşun və Amerika xalqının adından Sizə salamlarımı yetirim. Biz Sizinlə Azərbaycan Prezidenti kimi işləyəcəyimizə qəti surətdə əmin ola bilərsiniz.
Bildiyiniz kimi, Azərbaycanla bizi uzun müddətdir ki, sıx əlaqələr birləşdirir. Bu əlaqələr özünü Bakı-Tbilisi-Ceyhan kimi böyük layihələrdə büruzə verir. Həqiqətən, Sizin dediyiniz kimi, biz Beynəlxalq Maliyyə Korporasiyası və Avropa Yenidənqurma və İnkişaf Bankı ilə müvafiq iş apardıq ki, bu layihəyə lazımi maliyyə ayrılsın.
Eyni zamanda, Amerika Birləşmiş Ştatları Azərbaycana antiterror əməliyyatlarında iştirakına görə minnətdarlığını bildirir. Məlumdur ki, Amerika Birləşmiş Ştatlarının və Azərbaycanın hərbi qüvvələri bundan əvvəl Əfqanıstanda birgə işləmişlər.İndi isə İraqda birgə işləyirlər. Bu, bizim uzunmüddətli əlaqələrimiz üçün çox vacibdir.
Ümumiyyətlə, bizim üçün Qafqaz həm dünya siyasətində, həm də dünya iqtisadiyyatında vacib bir region hesab olunur. Biz keçmişdə olduğu kimi, indi də, gələcəkdə də Azərbaycanla ölkənizin qərbə uzunmüddətli inteqrasiyası üçün işləməyə hazırıq. Bu, bizim ən mühüm vəzifələrdəndir.
Bir neçə ay bundan əvvəl Sizi Vaşinqtonda görməkdən çox məmnun idik. Ümid edirik ki, daha tez-tez görəcəyik.
İLHAM ƏLİYEV: Çox sağ olun. Sizin dediyiniz kimi, ölkələrimiz arasında münasibətlər çox uğurla davam edir və bir neçə irimiqyaslı regional layihələr Azərbaycanın bilavasitə iştirakı ilə həyata keçirilir. Əlbəttə, bu və bu cür layihələri gələcəkdə də həyata keçirmək üçün regionda sülh və təhlükəsizlik bərqərar olunmalıdır.
Regionda hazırda müxtəlif münaqişələr mövcuddur. Bunların arasında ən ciddi münaqişə Ermənistan-Azərbaycan, Dağlıq Qarabağ münaqişəsidir. Amerika Birləşmiş Ştatları ATƏT-in Minsk qrupunun həmsədri kimi münaqişənin həll olunmasında öz rolunu oynayır. Biz ümidvarıq ki, gələcəkdə də Amerika Birləşmiş Ştatları öz nüfuzundan istifadə edərək bu münaqişənin həll olunmasında daha fəal rol oynayacaqdır və münaqişə beynəlxalq hüquq normaları əsasında öz həllini tapacaqdır.
Siz bu məsələ ilə yaxından tanışsınız. Çünki siz özünüz də Amerika Birləşmiş Ştatları tərəfindən Minsk qrupunun həmsədri olmusunuz və bu məsələnin mahiyyətini dərindən bilirsiniz. Ümid edirəm ki, yaxın gələcəkdə bu münaqişə sülh yolu ilə öz həllini tapacaqdır.
LİNN PASKO: Cənab Prezident, izazə verin, deyim ki, bu mövzu ətrafında elə bu binada Sizin atanızla böyük vaxt sərf edərək müzakirələr aparmışıq. Lakin həqiqətən biz gərək qüvvəmizi ikiqat artıraq ki, bu məsələ həll olunsun. Həqiqətən biz belə düşünürük və inanırıq ki, bu münaqişə regionu çox geriyə aparır. Həm Minsk qrupunun həmsədri kimi, həm də Amerika Birləşmiş Ştatları olaraq Sizinlə birlikdə işləyəcəyik ki, bu məsələ tezliklə sülh yolu ilə həll olunsun. Sadəcə, biz bundan sonra qüvvəmizi ikiqat artırmalı olacağıq.
Bildiyiniz kimi, mən ilk əvvəl Bakıya səfərə gəlmişəm. Daha sonra Tbilisiyə, Yerevana və Ankaraya gedəcəyəm. Həqiqətən çox inanırıq ki, bu məsələ tezliklə həll olunacaqdır.
Qəbulda Prezidentin İcra Aparatının şöbə müdiri Novruz Məmmədov, ABŞ-ın Bakıdakı səfiri Rino Harniş və Azərbaycanın Vaşinqtondakı səfiri Hafiz Paşayev iştirak edirdilər.
Bölmənin digər xəbərləri
