Azərbaycan Respublikasının Prezidenti İlham Əliyev müqəddəs Ramazan bayramı münasibətilə oktyabrın 19-da Prezident sarayında müsəlman ölkələrinin Bakıdakı fövqəladə və səlahiyyətli səfirlərini qəbul etmişdir.

Dövlətimizin başçısı İLHAM ƏLİYEV səfirləri salamlayaraq dedi:

- Hörmətli səfirlər, mən sizin hamınızı qarşıdan gələn müqəddəs Ramazan bayramı münasibətilə ürəkdən təbrik edirəm, xahiş edirəm ki, mənim təbriklərimi təmsil etdiyiniz ölkələrin dövlət və hökumət başçılarına çatdırasınız. Ramazan bayramı ölkəmizdə dövlət bayramı kimi Azərbaycan öz dövlət müstəqilliyini bərpa etdikdən sonra qeyd olunur. Buna baxmayaraq, bütün dövrlərdə bu bayram Azərbaycanda çox əziz bayram olmuşdur. Azərbaycanda yaşayan insanlar bütün dövrlərdə bu bayramı geniş qeyd etmişlər və bu gün bir daha demək istəyirəm ki, müstəqil dövlət kimi ölkəmizdə bu bayram hər bir azərbaycanlı üçün çox əziz bayramdır.

İndi Azərbaycan müstəqil bir dövlət kimi yaşayır və islam ölkələri ilə çox fəal əlaqələrimiz vardır. Biz bütün beynəlxalq məsələlərdə çox geniş əməkdaşlıq edirik. İslam Konfransı Təşkilatının fəal üzvü olan Azərbaycan öz xarici siyasətində bu istiqaməti həmişə diqqət mərkəzində saxlayır. Bildiyiniz kimi, bu il Azərbaycanda İslam Konfransı Təşkilatının xətti ilə iki çox əhəmiyyətli tədbir - xarici işlər və turizm nazirlərinin toplantıları keçirilmişdir. Bu onu göstərir ki, Azərbaycan çox çalışır İslam dünyasında öz yerini möhkəmləndirsin və İslam həmrəyliyinin möhkəmlənməsinə töhfəsini versin.

Təmsil etdiyiniz ölkələrlə də bizim çox işgüzar, səmimi münasibətlərimiz var. Mən təmsil etdiyiniz ölkələrin tam əksəriyyətinə səfərlər etmişəm və sizin ölkələrinizin dövlət və hökumət başçıları Azərbaycana səfərlər etmişdir. İkitərəfli formatda əlaqələrimiz çox uğurludur və bizim üçün çox əhəmiyyətlidir. Bizim əməkdaşlığımız, birgə səylərimiz ikitərəfli əlaqələrin inkişafı üçün vacibdir, həm də regionda gedən proseslərə çox böyük təsir göstərir, bizi narahat edən problemlərin həlli üçün də önəmlidir. Deyə bilərəm ki, bütün sahələrdə bizim aramızda qarşılıqlı anlaşma, böyük hörmət var, bizi dostluq qardaşlıq münasibətləri bağlayır.

Azərbaycanın ən ağrılı problemi olan Ermənistan-Azərbaycan, Dağlıq Qarabağ münaqişəsinin həllində də sizin ölkələrinizin dəstəyi bizim üçün çox vacibdir. Bu dəstəyə görə mən sizə və bütövlükdə bütün İslam dünyasına öz minnətdarlığımı bildirmək istəyirəm.

Çünki İslam Konfransı Təşkilatının qərarlarında, qətnamələrində bu məsələyə çox ciddi münasibət göstərilir, Azərbaycanın haqq işi dəstəklənir. Əlbəttə ki, bu, bizim mövqeyimizi daha da möhkəmləndirir. Bütün müsəlman ölkələri bir-birinə dayaq olmalıdır, lazım olan halda bir-birinə kömək etməlidir. İslam həmrəyliyi hər bir ölkənin möhkəmlənməsində öz rolunu oynayır və əminəm ki, bizim aramızda olan qardaşlıq, dostluq əlaqələri gələcəkdə daha da möhkəmlənəcəkdir.

İslam Konfransı Təşkilatının da son zamanlardakı fəaliyyəti çox uğurludur, təşkilat öz nufuzunu, dünya birliyində öz çəkisini artırır. Əlbəttə ki, təşkilatın uğurlu fəaliyyəti onun üzvü olan ölkələrin təşkilata olan münasibətinin nəticəsidir. Azərbaycan bu baxımdan İKT-də çox fəal iştirak edir və biz çalışırıq ki, İslam dünyasını narahat edən bütün məsələlərin həllində fəal rol oynayaq.

Əziz dostlar sizi qarşıdan gələn bu böyük bayram münasibətilə bir daha ürəkdən təbrik edirəm. Bir daha xahiş edirəm ki, mənim ən səmimi salamlarımı dövlət və hökumət başçılarına çatdırasınız, təmsil etdiyiniz ölkələrin xalqlarına mənim hörmət, məhəbbətimi çatdırasınız. Sağ olun.

Qazaxıstanın ölkəmizdəki fövqəladə və səlahiyyətli səfiri ANDAR ŞUKPUTOV Prezident İlham Əliyevə müraciətlə dedi:

- Hörmətli cənab Prezident, ilk növbədə, bütün müsəlmanlar üçün müqəddəs olan Ramazan bayramı münasibətilə səmimi təbriklərimizi qəbul edin. İcazə verin, bununla əlaqədar müsəlman dövlətlərinin burada olan bütün səfirləri adından Sizi və Sizin simanızda bütün qardaş Azərbaycan xalqını təbrik edim, sülh, firavanlıq və tərəqqi arzulayım. Sizin yeritdiyiniz xətt ölkənin iqtisadi sabitliyinin, iqtisadi inkişafının və beynəlxalq nüfuzunun möhkəmlənməsinin təmin olunmasına kömək edir. Fəal və tarazlı xarici siyasət beynəlxalq aləmdə də dəstəklənir. Ona görə də qeyd etmək xoşdur ki, müsəlman dünyası və müsəlman dövlətləri ilə əməkdaşlığın intensivləşdirilməsinə xüsusi diqqət yetirilir. Azərbaycan, haqlı olaraq, müsəlman birliyinin layiqli hörmətini qazanmışdır. Bu il İslam Konfransı Təşkilatı çərçivəsində bir sıra mühüm tədbirlər keçirilməsi buna parlaq sübutdur.

Təxminən 2 milyard nəfər əhalisi olan müsəlman ölkələrini öz sıralarında birləşdirən bu nüfuzlu beynəlxalq təşkilata il ərzində Azərbaycanın sədrlik etməsi münasibətilə Sizi təbrik edirik. Bununla əlaqədar xüsusi vurğulamaq istərdim ki, İKT-nin üzvü olan ölkələrin xarici işlər nazirlərinin 33-cü konfransı və turizm nazirlərinin 5-ci konfransı bu il Bakıda təşkilati baxımdan ən yüksək səviyyədə keçirilmişdir. Bu çox mühüm beynlxalq tədbirlərdə qəbul olunmuş yekun sənədləri planetimizdə sülhün və sabitliyin qorunub saxlanması üçün müsəlman ümmətinin ümumi səylərinin birləşdirilməsinə kömək etmişdir.

10 müsəlman dövlətinin daxil olduğu İqtisadi Əməkdaşlıq Təşkilatı ölkələrinin dövlət və hökumət başçılarının Bakıda keçirilmiş 9-cu zirvə toplantısı region çərçivəsində əməkdaşlığa əlavə təkan vermişdir. Ümumiyyətlə, cari il mühüm hadisələr baxımından Azərbaycan üçün çox əlamətdar və zəngin olmuşdur. Yaranması Azərbaycan xalqının ümummilli lideri Heydər Əliyevin adı ilə bağlı olan Bakı-Tbilisi-Ceyhan neft kəmərinin tikilib başa çatdırılması, şübhəsiz, Azərbaycanın daha böyük iqtisadi tərəqqisinə, inamlı inkişafına kömək edəcəkdir.

Hörmətli cənab Prezident, Siz Dağlıq Qarabağ probleminin nizama salınması prosesində mühüm addımlar atırsınız. Bununla əlaqədar ümidvar olduğumuzu bildiririk ki, çoxillik münaqişə diplomatik yolla, beynəlxalq normalara uyğun olaraq Azərbaycan Respublikasının ərazi bütövlüyü çərçivəsində həll ediləcəkdir. İslam ölkələri həmişə Azərbaycanın mövqeyini dəstəkləyirlər və əminik ki, bu, gələcəkdə də davam etdiriləcəkdir.

Hörmətli cənab Prezident, çıxışımın sonunda, icazə verin, səmimi qəbula görə həmkarlarım adından Sizə bir daha təşəkkür edim, Sizə və ailənizə xoşbəxtlik və firavanlıq, yüksək dövləti fəaliyyətinizdə yeni-yeni uğurlar, qardaş Azərbaycan xalqına isə sülh və tərəqqi arzulayım.

Ramazan bayramınız mübarək olsun!

İLHAM ƏLİYEV: Sağ olun.

Sonra səfirlər Azərbaycan Prezidenti ilə xatirə şəkli çəkdirdilər.