AZƏRBAYCAN PREZİDENTİ İLHAM ƏLİYEV YAZIÇILAR BİRLİYİNİN RƏHBƏRLİYİNİQƏBUL ETMİŞDİR
Yazıçılar Birliyinin qarşıdakı qurultaya hazırlaşdığını xatırladan Prezident İlham Əliyev dedi ki, bu, Azərbaycanın ictimai həyatında çox mühüm hadisə olacaqdır. Son illər ərzində Yazıçılar Birliyinin fəaliyyəti çox uğurlu olmuşdur, xüsusilə gənc yazıçılara böyük diqqət göstərilib, çoxlu işlər görülübdür. Ümid edirəm, qurultay da çox uğurla keçəcək və Yazıçılar Birliyinin fəaliyyətinin yeni mərhələsi başlanacaqdır. Bütün görülən işlərə görə sizə öz minnətdarlığımı bildirirəm.
Yazıçılar Birliyi rəhbərliyinin çox fəal işlədiyini və bunun Azərbaycanda böyük rəğbətlə qarşılandığını vurğulayan Prezident İlham Əliyev dedi ki, yazıçılara daha da gözəl şərait yaradılması üçün dövlət də öz tərəfindən əlindən gələni etməyə çalışır. Yaxşı bilirsiniz ki, hələ 1970-ci illərdə Heydər Əliyev tərəfindən yazıçılara daim diqqət göstərilibdir. O illərdə senzura mövcud idi, müəyyən ideoloji çərçivələr var idi, biz Sovet İttifaqında yaşayırdıq və təbii ki, ideoloji çərçivələrdən kənara çıxmaq çətin idi. Amma Heydər Əliyev bizim yazıçılarımızı daim müdafiə edirdi.
Dövlətimizin başçısı vurğuladı ki, Azərbaycan müstəqil dövlət kimi yaşamağa başlayandan sonra yaradıcılıq üçün tam sərbəstlik var. Xalqımızın lideri Heydər Əliyev 1993-cü ildən 2003-cü ilə qədər də daim yazıçılara, Yazıçılar Birliyinə, ümumiyyətlə, elm, mədəniyyət, ədəbiyyat xadimlərinə böyük diqqətlə yanaşırdı. Mən də çalışacağam ki, öz tərəfimdən bu siyasəti davam etdirim. Artıq müəyyən addımlar atılıbdır. İlk addım kimi, yazıçılarımızın əsərlərinin latın qrafikası ilə nəşri təşkil olunubdur. Bundan sonra da dövlət, hökumət orqanları tərəfindən hansı yardım, kömək lazımdırsa, biz onu edəcəyik. Əmin ola bilərsiniz ki, mən də bu istiqamətdə daim sizə kömək, arxa olacağam. Ümid edirəm, qurultay da çox uğurlu keçəcəkdir və Azərbaycan Yazıçılar Birliyi öz fəaliyyətini uğurla davam etdirəcəkdir.
Səmimi qəbula və xoş sözlərə görə minnətdarlığını bildirən Yazıçılar Birliyinin sədri, xalq yazıçısı Anar dedi ki, bizim nəsil ədəbiyyata gələndən Heydər Əliyevin himayəsini, qayğısını, diqqətini görmüşdür. O vaxtlar Moskvadan, Baltikyanı ölkələrdən gəlib burada hansı əsərlərin çap olunduğunu, yazıçılara göstərilən qayğını görəndə deyirdilər ki, Azərbaycanda necə gözəl şərait var. Bu şəraiti o vaxt sovet sisteminin qadağalarına baxmayaraq, Heydər Əliyev yaratmışdı. 1993-cü ilə qədər bizim ədəbi jurnallar çox ağır vəziyyətdə idi. Ümummilli liderimiz hakimiyyətə gələndən sonra Yazıçılar Birliyini və jurnalları büdcəyə qəbul etdi. Bəzən deyirlər, jurnallar nəyə lazımdır. Amma bu jurnallar olmasa, ədəbiyyat yoxdur.
Prezident İlham Əliyevin ulu öndərimiz Heydər Əliyev siyasətini uğurla davam etdirdiyini, latın əlifbası ilə kitabların çıxması haqqında Fərman verdiyini, Tərcümə Mərkəzinə bu il yardım göstərildiyini və gələn ildən onun dövlət büdcəsinə qəbul olunacağını xatırladan Birliyin sədri dedi ki, bütün bunlar çox böyük dəstəkdir. Güman edirəm ki, qurultayımız da sağlam ruhda keçəcək, Azərbaycan yazıçılarının 99 faizi sağlam mütərəqqi qüvvələrdir, dövlətçiliyimizin, xalqımızın mənafeyini düşünən insanlardır.
Xalq yazıçısı qurultaya hazırlıq işləri barədə də məlumat verdi, eyni zamanda, Yazıçılar Birliyinin 70 illiyinin qeyd ediləcəyini, yaşlı və cavan nəsildən olan qələm sahiblərinin problemləri ilə bağlı təkliflər olacağını bildirdi.
Qəbulda Prezident Administrasiyasının şöbə müdiri Fatma Abdullazadə iştirak edirdi.
Bölmənin digər xəbərləri
