Adətən artıq həyatda olmayan adamlar haqqında söhbət gedərkən «əgər aramızda olsaydı...» deyə felin şərt forması işə düşür. Amma bunu Elgünə aid etmək mümkün deyil! O bu gün də aramızdadır. İlk və son iş yerində, cəbhəyə yollanana qədər əməkdaşı olduğu «Azərbaycan» qəzeti redaksiyasında bu gün də onun ruhu dolaşır. Artıq illərdir ki, bizi hər səhər iş yerində Elgün İsmayılovun portreti, bu portretdən boylanan qətiyyətli baxışlar salamlayır. Günümüz bu baxışlarla başlanıb, bu baxışlarla da tamamlanır.

«Azərbaycan» qəzeti redaksiyasında şəhid Elgün İsmayılovun xatirəsinə yaradılmış guşədə oxuduğumuz bu sətirlər isə bizim üçün canını Azərbaycan yolunda fəda etmiş igid bir gəncin ömürlüyündən çox, Vətən qarşısında sədaqət andıdır: «Elgün Dağbəyi oğlu İsmayılov 1974-cü ilin 16 noyabrında Bakı şəhərində doğulub. Bakıdakı 3 saylı orta məktəbi, Bakı Politexnik Texnikumunu bitirdikdən sonra 1992-ci ildə Azərbaycan Texniki Universitetinə qəbul olunub. Milli Məclisin orqanı «Azərbaycan» qəzetində korrektor işləyirdi. 1993-cü ilin iyun ayında həqiqi hərbi xidmətə çağırılıb. 1993-cü ilin oktyabrında 172 saylı briqadanın tərkibində cəbhə bölgəsinə – Füzuli rayonuna göndərilib. Horadiz qəsəbəsinin düşməndən azad edilməsi uğrunda gedən qızğın döyüşlərdə göstərdiyi şücaətə görə Elgün İsmayılov komandanlıq tərəfindən mükafatlandırılıb. 1994-cü ilin yanvarından 172 saylı briqada Kəlbəcər bölgəsinə, Murov dağına göndərilib. Elgün briqadanın 42 nəfərdən ibarət kəşfiyyat bölüyünün əsgəri idi. Döyüşçü dostları Elgünü bacarıqlı və təcrübəli kəşfiyyatçı kimi tanıyırdılar. Komandanlığın onun haqqında verdiyi arayışda göstərilirdi ki, Elgün İsmayılov mürəkkəb relyefə malik Murov dağında bölüyün keçirdiyi 20 əməliyyatdan 16-da iştirak edib. 1994-cü il aprelin axırlarında keçirilmiş əməliyyata görə Elgün briqada komandanlığının fəxri fərmanına layiq görülüb. 1994-cü il mayın 25-dən 26-a keçən gecə Murovun Ömər yüksəkliyində düşmən arxasına keçərək ən vacib məlumat gətirməyə gedən 4 nəfərlik kəşfiyyat dəstəsinin tərkibində Elgün İsmayılov da düşmən həmləsinə məruz qalıb və həmin döyüşdə şəhid olub. Elgün İsmayılov 1994-cü il mayın 28-də Bakıda, Şəhidlər Xiyabanında dəfn edilib».

«Azərbaycan» qəzeti vətənpərvərlik tərbiyəsi kimi son dərəcə vacib bir mövzunu daim diqqət mərkəzində saxlayır. Dörd ildir ki, redaksiyada Elgün İsmayılovun adını daşıyan xüsusi mükafat təsis edilib. «Azərbaycan» qəzetində çalışanlar və Elgünün yaxınları üçün hər il noyabrın 16-ı onun doğum günü münasibətilə redaksiyamızda təşkil edilmiş mərasimlə yadda qalır. Elgün İsmayılov mükafatının qaliblərinin müəyyənləşdirilməsi üçün keçirilən müsabiqəyə də elə həmin gün yekun vurulur. Qaliblərin adları açıqlanır. Onlara mükafatlar təqdim olunur.

Dünən təşkil edilmiş mərasim də ənənəvi qaydada Elgün İsmayılovun məzarını ziyarətlə başlandı. Onun timsalında bütün Azərbaycan şəhidlərinin ruhuna dualar oxundu. Mərhumun məzarı üzərinə tər qərənfillər qoyuldu. Anım mərasimi «Azərbaycan» qəzetinin «Mətbuat muzeyi»ndə davam etdirildi.

«Azərbaycan» qəzetinin baş redaktoru, Milli Məclisin deputatı Bəxtiyar Sadıqov mərasimi giriş sözü ilə açaraq Azərbaycanın tarixi taleyində özünü göstərən iki məqama diqqət yönəltdi. Xatırlatdı ki, XX əsrin iki müxtəlif dönəmində dövlət müstəqilliyinin əldə edilməsi və qorunması uğrunda haqq mübarizəsinə qalxan Azərbaycan xalqı hər iki mərhələdə düşmənin təzyiqləri ilə qarşılaşıb. İstəmədən ədalətsiz müharibəyə cəlb edilib: «Birinci mərhələdə bu, dövlət müstəqilliyinin itirilməsi ilə nəticələnsə də, şükürlər olsun ki, XX əsrin sonlarında Azərbaycanı yenidən müstəqil görmək, müstəqil dövlətimizin uğurlarına sevinmək xoşbəxtliyi bizlərə nəsib oldu. Bununla belə düşmən yenə uzaqda deyildi. Ermənistan silahlı birləşmələrinin Azərbaycana qarşı hərbi təcavüzü nəticəsində torpaqlarımızın 20 faizi işğal edildi. 1 milyondan artıq soydaşımız qaçqın və məcburi köçkün taleyi ilə üzləşdi. Amma düşmən daha müstəqil dövlətimizi sarsıtmaq gücündə deyil. Əsası ümummilli liderimiz Heydər Əliyev tərəfindən qoyulmuş doğru yol ulu öndərimizin özünün də qeyd etdiyi kimi, Azərbaycanın müstəqilliyinin dönməzliyini, daimiliyini, əbədiliyini təmin etmişdir. Bu gücün, bu qətiyyətin gətirdiyi inam Heydər Əliyev kursunun ən layiqli davamçısı Azərbaycan Prezidenti cənab İlham Əliyevin Ermənistan-Azərbaycan, Dağlıq Qarabağ münaqişəsi ilə bağlı bəyanatlarında da öz əksini tapır. Dövlət rəhbərimiz bəyan edir ki, Azərbaycan öz ərazisində ikinci erməni dövlətinin yaradılmasına heç zaman imkan verməyəcək, ərazisinin bir qarışını da kimsəyə güzəştə getməyəcək. Azərbaycanda ordu quruculuğu prosesi əzmlə davam etdirilir. Ölkəmizin müdafiə potensialı ildən-ilə güclənir».

Bəxtiyar Sadıqov vurğuladı ki, Azərbaycanda vətən yolunda canından keçməyə hər an hazır olan oğullar həmişə olub, var və daim olacaq. Şəhid Elgün İsmayılovun taleyi də buna bir misaldır. O, Elgünün öz qısa ömrü ilə böyük vətənpərvərlik nümunəsi yaratdığını qeyd etdi. Azərbaycanın Elgün İsmayılov kimi övladları ilə qürur duyduğunu bildirdi.

Baş redaktor hər il «Azərbaycan» qəzeti əməkdaşları arasında Elgün İsmayılov mükafatı uğrunda keçirilən yaradıcılıq müsabiqəsi barədə danışdı. Bildirdi ki, bu mükafatın qalibi olmaq «Azərbaycan» qəzetinin hər bir əməkdaşı üçün böyük şərəfdir.

Daha sonra Münsiflər Heyətinin qərarı açıqlandı. Məlum oldu ki, ümumi rəyə əsasən qəzetin bölgə müxbiri Famil Abbasovun «Yurd yeri», həmçinin «Bu köç yaman uzun çəkdi» silsilə yazıları, parlament və siyasət şöbəsinin müxbiri Yadigar Cəfərlinin «Təzə nırxlı köhnə bazarlar» yazısı əsas mükafata layiq görülüb. Dövlət quruculuğu şöbəsinin müxbiri Rəsmiyyə Rzalının «Sənaye tullantılarından hazırlanmış oyuncaqlar körpələrin səhhəti üçün ciddi təhlükədir», parlament və siyasət şöbəsinin müxbiri Rüstəm Qaraxanlının «Ağ damlı Ağdam» sərlövhəli yazıları isə həvəsləndirici mükafat qazanıb. Mükafatları qaliblərə şəhid Elgün İsmayılovun atası Dağbəyi İsmayılov təqdim etdi.

Qaliblər şəhidlik zirvəsinə ucalmış Elgün İsmayılovun adını daşıyan bu yüksək mükafata layiq görülmələrindən qürur duyduqlarını bildirdilər.

Şəhid atası Dağbəyi İsmayılov şəhidlərimizin müqəddəs ruhuna göstərilən bu cür ehtirama görə «Azərbaycan» qəzeti kollektivinə öz dərin minnətdarlığını bildirdi. Onun fikrincə, bu münasibətin özü də böyük vətənpərvərlik nümunəsidir. Dağbəyi İsmayılov «Azərbaycan» qəzetində çalışan hər bir insanda yüksək vətənpərvərlik ruhu gördüyünü və bu ruhun qəzetin bütün saylarında müşahidə olunduğunu diqqətə çatdırdı. Şəhid atası onu da əlavə etdi ki, bu cür ənənələrin formalaşdırılması cəmiyyətimizdə vətənə bağlılıq hisslərinin gücləndirilməsi baxımından son dərəcə mühümdur. Şəhid atası qalibləri təbrik etdi. «Azərbaycan» qəzeti kollektivinə gələcək fəaliyyətində uğurlar dilədi.