SİYASƏT
AZƏRBAYCAN RESPUBLİKASI DAXİLİ İŞLƏR NAZİRLİYİ VƏ RESPUBLİKA BAŞ PROKURORLUĞU MƏTBUAT XİDMƏTLƏRİNİN MƏLUMATI
Xəbər verildiyi kimi, 2002-ci il mayın 7-də Sabunçu rayon icra hakimiyyəti başçısının Nardaran qəsəbəsi üzrə nümayəndəsinə qarşı zor tətbiq edərək xuliqanlıq, ictimai qaydanın pozulmasına səbəb olan hərəkətlər törətdiklərinə və xidməti vəzifələrini yerinə yetirmək üçün hadisə yerinə dəvət edilmiş polis əməkdaşlarına müqavimət göstərərək xəsarət yetirdiklərinə görə, iyunun 3-də dörd nəfər həbs edilmiş, üç nəfər barəsində inzibati qanunvericiliyə uyğun tədbirlər görülmüşdür.
Həmin gün, tutulmuş şəxslərin azad edilməsi tələbi ilə 200 nəfərədək qəsəbə sakini qanunsuz aksiya keçirərək, hakimiyyət orqanlarına qarşı itaətsizliyə çağırışlar etmiş, kütləvi iğtişaş törətmişlər. Asayişi təmin edən polis əməkdaşlarına zor tətbiq edilməklə silahlı müqavimət göstərilmiş, nəticədə polis orqanına və əməkdaşlara məxsus 8 avtomaşın əzilmiş, 4-ü yandırılmışdır. Asayişi mühafizə qüvvələrinə atılmış daş, kəsək, yandırıcı vasitələr və odlu silahlardan açılmış atəş nəticəsində, sonradan dəqiqləşdirilmiş məlumatlara əsasən, 70 polis əməkdaşı yaralanmış, o cümlədən 7-si ağır, digərləri isə müxtəlif dərəcəli bədən xəsarətləri almışlar.
Göstərilən kütləvi iğtişaş faktı üzrə respublika Prokurorluğu tərəfindən başlanmış cinayət işi ilə əlaqədar keçirilmiş istintaq-əməliyyat tədbirləri nəticəsində, həmin cinayətin fəal iştirakçılarından olan Nardaran qəsəbə sakinləri - Elman Qasımov, Hacıbala Əhmədov, Sədi Qasımov, Rəşad Əliyev, Elxan Cabbarov, İslam partiyasının Salyan rayon şöbəsinin sədri Mirzəağa Əzizov və üzvü Elşən Ağamalıyev, Hacıqabul rayon sakinləri - Fərhad Şıxəliyev və Vüsal Ağamoğlanov həbs olunmuşlar.
İyunun 5-də saat 17.30 radələrində Nardaran ətrafında qoyulmuş polis postlarından birində cinayətkar aləmdə tanınmış, sonradan guya dinə tapınmaqla islah yoluna keçmiş Hafiz Atakişiyev saxlanılmış, ondan “Brauninq” tipli tapança və narkotik vasitə götürülmüşdür. Bu faktla bağlı cinayət işi başlanılaraq istintaq aparılır.
Qeyd olunmalıdır ki, həyata keçirilmiş istintaq-əməliyyat tədbirləri zamanı, Nardaranın ayrı-ayrı sakinlərində qeyri-qanuni saxlanılan silahların mövcudluğu, habelə bu silahlardan gələcəkdə dövlət qurumlarına qarşı istifadə etmək barədə qəsəbədə təbliğat aparılması müəyyən edilmişdir.
Bununla əlaqədar, Daxili İşlər Nazirliyi və respublika Prokurorluğu qanunsuz silah saxlanılmasının ölkə qanunvericiliyinə əsasən cinayət məsuliyyəti doğurduğunu bir daha xatırladır və qəsəbə sakinlərini həmin silahların təxirəsalınmadan, könüllü olaraq Sabunçu Rayon Polis İdarəsinə təhvil verilməsini təklif edir. Onu da xatırladırıq ki, silahı könüllü və vaxtında təhvil verənlər məsuliyyət daşımayacaqlar.
Bundan başqa, istintaq-əməliyyat tədbirləri ilə o da müəyyən edilmişdir ki, son günlər Nardaran qəsəbəsində törədilən ağır və qanlı cinayət hadisələrindən nəticə çıxarmayan ayrı-ayrı şəxslər və bəzi siyasətbazlar yerli sakinlərin hüquqlarının müdafiəsi pərdəsi altında onları qanuni dövlət strukturlarına qarşı çıxmağa və vətəndaş itaətsizliyinə çağırır, habelə silahlı müqavimətə sövq edən çağırışlar səsləndirirlər. Əslində isə, belələri Nardaran sakinləri vasitəsilə özlərinin şəxsi və qrup mənafelərini, siyasi maraqlarını və ya cinayətkar niyyətlərini həyata keçirmək məqsədi güdürlər.
Daxili İşlər Nazirliyi və respublika Prokurorluğu qəsəbə sakinlərini belə riyakar təbliğata uymamağa, ayrı-ayrı siyasətbazların ambisiyalarının qurbanı olmamağa, dövlətin qanunlarına və hüquq qaydalarına riayət etməyə çağırır.
Bir daha bildiririk ki, törədilən hər bir hüquqazidd hərəkətin qarşısı Azərbaycan dövlətinin milli maraqlarına və cəmiyyətimizin mənafeyinə uyğun olaraq, bundan sonra da qətiyyətlə alınacaq və heç kəs törətdiyi cinayət əməllərinə görə məsuliyyətdən yayına bilməyəcəkdir.