AZƏRBAYCAN RESPUBLİKASI PREZİDENTİNİN MƏTBUAT XİDMƏTİNİN MƏLUMATI
Qəbul zamanı səfir Endrü Taker Azərbaycan Respublikasının Prezidenti İlham Əliyevə diplomatik fəaliyyət müddətinin bitməsi haqqında məlumat verərək, tezliklə vətəninə dönəcəyini qeyd etmişdir. Azərbaycanda işlədiyi müddətdə ona göstərilən etimadı, yaradılan şəraiti yüksək qiymətləndirən səfir Azərbaycan Prezidentinə dərin minnətdarlığını bildirmişdir. O, Azərbaycan Respublikası ilə Böyük Britaniya və Şimali İrlandiya Krallığı arasında formalaşmış dostluq və əməkdaşlıq münasibətlərini yüksək qiymətləndirmiş və bu münasibətlərin gələcəkdə daha da inkişaf edəcəyinə inamını ifadə etmişdir.
Eyni zamanda səfir Endrü Taker Prezident İlham Əliyevə öz nitq və çıxışlarında Azərbaycanın gələcəyi, sosial inkişaf, demokratiya haqqında bəyan etdiyi fikirləri Britaniya hökumətinin yüksək qiymətləndirdiyini, ürəkdən alqışladığını vurğulamışdır. Prezident İlham Əliyevin hər bir Azərbaycan vətəndaşının Prezidenti olacağı haqqında bəyanatı, yoxsulluğun sürətlə azaldılmasını nəzərdə tutan iqtisadi proqramı Britaniya hökumətində böyük maraq doğurmuş və bəyənilmişdir.
Prezident İlham Əliyev səfir Endrü Takerə bildirmişdir ki, andiçmə mərasimində, ondan əvvəl və sonra verdiyi bəyanatlar onun qəti mövqeyidir və Azərbaycanın demokratik, hüquqi, dünyəvi dövlət kimi inkişafı, iqtisadi yüksəlişi və sosial rifahı onun əsas məqsədidir.
Azərbaycan Respublikasının Prezidenti İlham Əliyev Böyük Britaniya və Şimali İrlandiya Krallığının Azərbaycandakı səfiri Endrü Takerə respublikamızda işlədiyi müddətdə iki ölkə arasında dostluq və sıx əməkdaşlıq münasibətlərinin genişlənməsi və möhkəmlənməsi istiqamətində fəaliyyətinə yüksək qiymət vermiş, ona təşəkkürünü bildirmiş, gələcək işlərində uğurlar arzulamışdır.
Sonda səfir Endrü Taker Azərbaycan Respublikasının Prezidenti İlham Əliyevə səmimi qəbula görə minnətdarlığını bildirmişdir.
Bölmənin digər xəbərləri
