SİYASƏT
AZƏRBAYCAN RESPUBLİKASININ MƏRKƏZİ SEÇKİ KOMİSSİYASINDA
Sonra gündəliyin digər məsələlərinə baxılmışdır. Mərkəzi Seçki Komissiyası sədrinin müavini Svetlana Qasımova “Azərbaycan Respublikası Prezidentinin seçkilərinə hazırlıqla əlaqədar dairə seçki komissiyalarının üzvləri üçün zona seminarlarının keçirilməsi Gündəliyi”nin təsdiq edilməsi haqqında məlumat vermişdir. Komissiya bu Gündəliyin təsdiq olunması barədə qərar qəbul etmişdir.
Mərkəzi Seçki Komissiyasının katibi Vidadi Mahmudov Azərbaycan Respublikası Prezidentliyinə namizədliyi təsdiq edilmiş cənab İsmayılov İlyas Abbas oğlunun, Mərkəzi Seçki Komissiyasının katibi İnqilab Nəsirov isə cənab Əliyev Yunus İsaxan oğlunun prezidentliyə namizədliklərinin qeydə alınması haqqında məlumat vermişlər. Komissiya İsmayılov İlyas Abbas oğlunun və Əliyev Yunus İsaxan oğlunun Azərbaycan Respublikası prezidentliyinə namizədliklərinin qeydə alınması barədə qərar çıxarmışdır.
Mərkəzi Seçki Komissiyasının üzvü Azər Tağıyev “Azərbaycan Respublikası Prezidentinin seçkiləri zamanı seçkiqabağı təşviqatın aparılması ilə bağlı Azərbaycan Respublikası Seçki Məcəlləsinin bəzi müddəalarının tətbiqi və prezident seçkilərində iştirak etmək üçün qeydə alınmış namizədlər, namizədləri qeydə alınmış siyasi partiyalar, siyasi partiya bloklarına Dövlət Teleradio Şirkətinin kanallarında efir vaxtının verilməsi, dövri mətbuat səhifələrində seçkiqabağı təşviqat materiallarının dərc edilməsi qaydaları haqqında Təlimat”ın, Mərkəzi Seçki Komissiyasının katibi İnqilab Nəsirov isə “Məntəqə seçki komissiyalarının formalaşdırılması qaydaları haqqında Təlimat”ın təsdiq edilməsi barədə iclas iştirakçılarına məlumat vermişlər. Komissiya hər iki təlimatın təsdiq olunmasını qərara almışdır.
Mərkəzi Seçki Komissiyasının katibi İnqilab Nəsirov “Mərkəzi Seçki Komissiyası katibliyinin Əsasnaməsi”nin təsdiq edilməsi haqqında məlumat vermişdir. Komissiya katibliyin Əsasnaməsini verilmiş təkliflər nəzərə alınmaqla təsdiq etmişdir.
İclasda Mərkəzi Seçki Komissiyası sədrinin müavini Svetlana Qasımovanın, Mərkəzi Seçki Komissiyasının katibi İnqilab Nəsirovun və Mərkəzi Seçki Komissiyasının katibi Vidadi Mahmudovun bəzi seçki komissiyalarının tərkibində dəyişikliklər edilməsi barədə məlumatları dinlənilmişdir. Komissiya bununla əlaqədar müvafiq qərar qəbul etmişdir.
Mərkəzi Seçki Komissiyasının katibi Vidadi Mahmudovun səsvermənin nəticələri haqqında dairə və məntəqə seçki komissiyalarının protokol nümunələrinin təsdiq edilməsi haqqında məlumatı dinlənildikdən sonra həmin protokol nümunələrinin təsdiq olunması qərarlaşdırılmışdır.
Mərkəzi Seçki Komissiyasının katibi İnqilab Nəsirov azadlıqdan məhrumetmə yerlərində təqsirli bilinən, məhkum olunan şəxslərin səs verməsi üçün xüsusi vəsiqə formasının təsdiq edilməsi haqqında məlumat vermişdir. Komissiya həmin vəsiqə formasının təsdiq olunmasını qərara almışdır.
Mərkəzi Seçki Komissiyasının katibi İnqilab Nəsirovun Mərkəzi Seçki Komissiyasına daxil olmuş müraciətlərə baxılması haqqında məlumatı müzakirə olunmuş və sənədlərin araşdırılaraq müvafiq tədbirlər görülməsindən ötrü Azərbaycan Respublikasının Baş Prokurorluğuna göndərilməsi qərara alınmışdır.
Azərbaycan Respublikası Prezidentliyinə qeydə alınmış namizədlərin təhlükəsizliyinin təmin edilməsi haqqında məsələ komissiyanın qərarı ilə növbəti iclasa keçirilmişdir.
İclasın sonunda cari məsələlərə baxılmışdır.
Mərkəzi Seçki Komissiyasının iclasında Seçki Sistemləri üzrə Beynəlxalq Fondun (İFES), ATƏT-in Demokratik Təsisatlar və İnsan Hüquqları Bürosunun Bakı ofisinin, ABŞ-ın Milli Demokratiya İnstitutunun, Avropa Şurası Baş katibinin Bakı ofisinin, ABŞ səfirliyinin təmsilçiləri, xarici və yerli kütləvi informasiya vasitələrinin nümayəndələri iştirak etmişlər.
Mərkəzi Seçki Komissiyasının
Mətbuat xidməti.