AZƏRBAYCAN RESPUBLİKASININ PREZİDENTİ İLHAM ƏLİYEV ÜMUMMİLLİ LİDERİMİZ HEYDƏR ƏLİYEVİN MƏZARINI ZİYARƏT ETMİŞDİR
Müasir Azərbaycan dövlətinin memarı və qurucusu, xalqımızın müdrik rəhbəri, türk dünyasının böyük oğlu, ümummilli liderimiz Heydər Əliyevin əbədiyyətə qovuşmasından üç il keçir. Ulu öndərimizin, əbədiyaşar Prezidentimizin Fəxri xiyabandakı məzarı bu illər ərzində xalqımızın müqəddəs ziyarətgahına çevrilmişdir.
Dekabrın 12-də Azərbaycan Respublikasının Prezidenti İlham Əliyev və onun ailə üzvləri Fəxri xiyabana gələrək, ulu öndər Heydər Əliyevin məzarını ziyarət etmişlər.
Milli Məclisin deputatları, nazirlər, komitə, şirkət, konsern və idarələrin rəhbərləri, respublika ictimaiyyətinin nümayəndələri, xarici dövlətlərdən gəlmiş qonaqlar, Bakıdakı diplomatik nümayəndəliklərin rəhbərləri, müxtəlif ölkələrin təmsilçiləri də Fəxri xiyabana gəlmişdilər.
Azərbaycan Respublikasının Prezidenti İlham Əliyev ulu öndərin məzarı önünə əklil qoydu.
Prezidentin ailə üzvləri, mərhumun yaxınları məzarın önünə gül dəstələri düzdülər.
Dövlətimizin başçısı və ailə üzvləri görkəmli oftalmoloq alim, akademik Zərifə xanım Əliyevanın, dövlət xadimi Əziz Əliyevin və professor Tamerlan Əliyevin məzarları önünə də gül dəstələri qoydular.
Qafqaz Müsəlmanları İdarəsinin sədri şeyxülislam Allahşükür Paşazadə ümummilli liderimizin ruhuna dua oxudu.
Ulu öndərin məzarının ziyarət edilməsi mərasimində Milli Məclisin sədri Oqtay Əsədov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər iştirak edirdilər.
X X X
Xalqımızın dahi oğlunun vəfatının ildönümü günü paytaxt sakinləri, respublikamızın rayon və şəhərlərinin nümayəndələri, eləcə də xarici ölkələrdən gəlmiş çoxsaylı qonaqlar sübh tezdən dəstə-dəstə Fəxri xiyabanı ziyarət edərək, Azərbaycanın dahi oğlunun əziz xatirəsini dərin ehtiramla yad edir, burada ucaldılmış əzəmətli abidə kompleksinin önünə əklillər, gül dəstələri qoyur, görkəmli şəxsiyyətə Allah-taaladan rəhmət diləyirdilər.
Bölmənin digər xəbərləri
