AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Mən istərdim ki, bu imkandan istifadə edib Sizi Azərbaycan Respublikası Prezidentinin andiçmə mərasimi münasibətilə təbrik edim.
Bildiyiniz kimi, Azərbaycan və Dünya Bankı Qrupu son on il ərzində sıx əlaqələri inkişaf etdirmişlər. Biz ümid edirik ki, bu səmərəli əməkdaşlığı gələcəkdə Sizinlə və Sizin rəsmilərlə də davam etdirəcəyik. Növbəti bir neçə il Azərbaycan üçün olduqca çətin və həlledici olacaqdır. Bu illər azərbaycanlıların indiki və gələcək nəsillərinə yaxşılığa doğru dəyişiklik ümidi və inamı verir. Sizin hökumətin ölkənin sərvətlərindən istifadə etməklə bağlı qəbul edəcəyi qərarlar böyük müdriklik, eləcə də, qətiyyətli peşəkar və texniki əsası olan addımlar tələb edəcəkdir.
Bizim inanmağa tam əsasımız var ki, əvvəlki Prezident Heydər Əliyevin səyləri, o cümlədən yaratdığı Dövlət Neft Fondu, büdcə xərclərinin idarəçiliyi islahatı, ARDNŞ-in yeni strukturu barədə qərarı, qeyri-neft sektorunda biznes mühitinə diqqətin artırılması, Azərbaycanda Yoxsulluğun azaldılması və iqtisadi inkişaf üzrə dövlət proqramı üzləşə biləcəyiniz çətinlikləri aradan götürmək üçün yaxşı zəmin yaradır. Bu kontekstdə Sizin andiçmə mərasimindəki nitqiniz zamanı iqtisadi və sosial islahatları davam etdirəcəyinizi və dərinləşdirəcəyinizi vurğulamağınız məni sevindirdi.
Bu son həftə Dünya Bankının Direktorlar şurası Beynəlxalq Maliyyə Korporasiyasının “Azəri-Çıraq-Günəşli” Faza-1 və Bakı-Tbilisi-Ceyhan kəməri layihələrinə dəstəyini təsdiq etdi. Bu, bizim Azərbaycan üçün nəzərdə tutulan Ölkəyə yardım strategiyasının vacib komponentidir ki, buraya da Beynəlxalq İnkişaf Agentliyi və Beynəlxalq Maliyyə Korporasiyasının Yoxsulluğun azaldılması üzrə dövlət proqramının tətbiqi çərçivəsində ölkənin qeyri-neft sektoruna, təhsilə, sosial müdafiəyə, kiçik biznesin inkişafına, kənd təsərrüfatına və ətraf mühitin qorunmasına yönəlmiş vacib proqramlar daxildir. Cənubi Qafqaz ölkələri üzrə bölümümüzün rəhbəri xanım Donna Dousett-Koyrolo Sizinlə və Sizin nümayəndələrlə sıx işləyərək, Dünya Bankının müxtəlif səylərinin tənzimlənməsinə yardım edəcəkdir.
Azərbaycan Respublikasının Prezidentliyi müddətinin lap əvvəlində icazə verin, Sizi bir daha təbrik edim və gələcək illərdə Sizə çoxlu uğur arzulayım.
Ceyms Vulfenson,
Dünya Bankının Prezidenti.
6 noyabr 2003-cü il.
Bölmənin digər xəbərləri
