Azərbaycan Rusiyanın birbaşa uçuşlar həyata keçirdiyi ölkələrdən biridir
Moskva, 18 may, AZƏRTAC
Beynəlxalq istiqamətlərin sayının azalması fonunda Azərbaycan Rusiyanın yay mövsümündə birbaşa hava əlaqəsinin mövcud olduğu ölkələr sırasındadır.
AZƏRTAC xəbər verir ki, bu barədə Rusiya Tur Operatorları Assosiasiyasının (ATOR) açıqlamasında deyilir. Assosiasiyanın məlumatına görə, rusiyalılar bu yay yalnız 31-32 ölkəyə birbaşa uçuş edə biləcəklər ki, bu da qış cədvəli ilə müqayisədə təxminən 25 faiz azalma deməkdir.
Rusiyadan birbaşa uçuşların mövcud olduğu ölkələrin siyahısına Azərbaycan, Türkiyə, BƏƏ, Misir, Çin, Tailand, Serbiya, Hindistan, Vyetnam və bir sıra digər dövlətlər daxildir. Assosiasiya izah edib ki, yanacaq və geosiyasi böhran səbəbindən Kuba və Venesuelaya uçuşlar yay cədvəlinə daxil edilməyib.
ATOR qeyd edib ki, bəzi beynəlxalq istiqamətlər mövsümilik, yanacaq böhranı, geosiyasi vəziyyət və Yaxın Şərqdəki vəziyyətin gərginləşməsi ilə bağlı məhdudiyyətlər səbəbindən yay cədvəlindən çıxarılıb.
Ekspertlər bildiriblər ki, bu yay kütləvi turizm məqsədilə birbaşa uçuşların mövcud olduğu təxminən 15 ölkə rusiyalı turistlər üçün əlçatan olacaq. Azərbaycan isə coğrafi yaxınlığı, nəqliyyat əlçatanlığı və sabit hava əlaqələri səbəbindən ən çox tələbat yaranan istiqamətlərdən biri olaraq qalır.
Bölmənin digər xəbərləri
