AZƏRBAYCAN ŞAHMAT FEDERASİYASI BƏYANAT YAYMIŞDIR
AZƏRTAC xəbər verir ki, Azərbaycan Şahmat Federasiyası (AŞF) nüfuzlu “Linares” turnirinin ilk mərhələsinə hazırlaşmaq məqsədi ilə əvvəlcədən Meksikaya səfər etmiş beynəlxalq qrossmeyster Teymur Rəcəbov üçün mehmanxanada ayrılmış otaqda qarət hadisəsi ilə bağlı bəyanat yaymışdır.
Bəyanatda deyilir ki, hadisə zamanı onun şəxsi karyerası ilə bağlı məlumatların yerləşdiyi kompyuter oğurlanmışdır. T.Rəcəbovun dəfələrlə müraciətinə baxmayaraq, yarışın təşkilatçıları tərəfindən heç bir tədbir görülməmişdir. Mehmanxana rəhbərliyi isə nüfuzuna xələl gələcəyindən ehtiyatlanaraq, yalnız iki gündən sonra hüquq-mühafizə orqanlarına müraciət etmişdir. Psixoloji stress keçirən T.Rəcəbov etiraz əlaməti olaraq turnirdə iştirakdan imtina etmişdir.
Məqsədyönlü şəkildə həyata keçirilən bu hadisənin araşdırılması və cinayətkarların cəzalandırılması tələbi ilə Azərbaycan Gənclər və İdman Nazirliyi və AŞF Beynəlxalq Şahmat Federasiyasına (FİDE) bəyanat ünvanlamışdır.
Bəyanatda bu cür hadisələrin baş verməsi halları pislənilir və beynəlxalq yarışları təşkil edən ölkələrdən idmançılara diqqət və qayğının artırılması tələb olunur.
Bölmənin digər xəbərləri
