CƏMİYYƏT
Azərbaycan Tibb Universitetində rezidentlərinin ikinci elmi-praktiki konfransı keçirilmişdir
Bakı, 23 may (AZƏRTAC, Elçin Hüseynov). Xalqımızın ümummilli lideri Heydər Əliyevin anadan olmasının 91 illiyi münasibətilə mayın 23-də Azərbaycan Tibb Universiteti (ATU) rezidentlərinin ikinci elmi-praktiki konfransı keçirilmişdir.
AZƏRTAC xəbər verir ki, konfrans iştirakçıları əvvəlcə ulu öndər Heydər Əliyevin universitetin foyesindəki büstünün önünə əklil qoymuş və gül dəstələri düzmüşlər.
Sonra ATU-nun böyük zalında davam edən tədbirdə Azərbaycan Respublikasının dövlət himni səsləndirilmişdir.
Konfransın açılışında çıxış edən ATU-nun rektoru, Milli Məclisin deputatı, akademik Əhliman Əmiraslanov ulu öndər Heydər Əliyevin Azərbaycan elminin və təhsilinin himayədarı olduğunu, bu sahədə çalışanlara, xüsusilə səhiyyə işçilərinə həmişə diqqət və qayğı göstərdiyini xatırlatmışdır. Bildirmişdir ki, Azərbaycanda səhiyyənin inkişafı, universitetin maddi-texniki bazasının möhkəmləndirilməsi və ölkəmizdə tibb kadrlarının hazırlanması məhz ulu öndərin adı ilə bağlıdır.
ATU-nun klinikalarının ümummilli lider Heydər Əliyevin böyük qayğısı sayəsində yaradıldığını diqqətə çatdıran rektor vurğulamışdır ki, onun layiqli davamçısı Prezident İlham Əliyevin dəstəyi ilə inşa olunmuş universitetin çoxprofilli tədris-terapevtik və cərrahiyyə klinikaları ən müasir avadanlıqla təchiz olunmuşdur. Bu da yüksək ixtisaslı həkim kadrlarının hazırlanmasına dövlət başçısının verdiyi önəmin əyani təzahürüdür.
Bildirilmişdir ki, ölkəmizdə 2011-ci ildən etibarən ali tibb təhsili əsasında həkim mütəxəssislərin hazırlanması məqsədi ilə rezidenturaya qəbul həyata keçirilir. Hazırda ATU-da 38 ixtisas üzrə rezidenturada 390 nəfər təhsil alır. Universitetin klinikalarında rezidentlərin işləməsi üçün hər cür şərait yaradılmış, onlar fəal şəkildə xəstələrin müayinə və müalicəsinə cəlb olunmuşlar. Rezidentlərin elmi hazırlığına da xüsusi diqqət yetirilir. Klinikalarda bütün laboratoriya və diaqnostik kabinetlər elmi araşdırma aparmaq istəyən rezidentlərin ixtiyarına verilmişdir.
Qeyd edilmişdir ki, ötən ilin oktyabr ayında ATU-nun rezidentləri üçün attestasiya imtahanı keçirilmişdir. Rezidentlər böyük müvəffəqiyyətlə attestasiyadan keçmişlər.
ATU-da rezidenturanı bitirəcək həkimlərin ən yaxşı mütəxəssislər olacağına əminliyini bildirən rektor konfransın işinə uğurlar arzulamışdır.
Sonra konfransın plenar iclası başlamışdır. Plenar iclasda rezidentlərinin tibbin müxtəlif sahələri üzrə məruzələri dinlənilmiş və müzakirələr aparılmışdır.
Konfrans işini bölmə iclaslarında davam etdirmişdir.