AZƏRBAYCANDA GENİŞMİQYASLI DEMOKRATİK İSLAHATLARIN APARILMASI TƏQDİRƏLAYİQDİR
Tomas Hammerberqi yeni vəzifədə fəaliyyətə başlaması münasibətilə təbrik edən nazir Fikrət Məmmədov ölkəmizdə həyata keçirilən demokratik dəyişikliklər, insan hüquqlarının daha etibarlı müdafiəsinə xidmət edən məhkəmə hakimiyyətinin daha da möhkəmləndirilməsi, ədalət mühakiməsinin səmərəliliyinin artırılması, penitensiar sistemin fəaliyyətinin yaxşılaşdırılması üzrə aparılan mütərəqqi islahatlardan danışmışdır. O, hakimliyə namizədlərin ən müasir və şəffaf prosedurlar əsasında seçilməsi barədə ətraflı məlumat vermiş, bu sahədə nüfuzlu beynəlxalq təşkilatlarla, o cümlədən Avropa Şurası ilə səmərəli əməkdaşlığı xüsusi vurğulamışdır.
Ədliyyə naziri Azərbaycanda aparılan köklü hüquq islahatları çərçivəsində korrupsiyaya qarşı mübarizə, yoxsulluğun azaldılması, əhaliyə göstərilən hüquqi xidmətlərin keyfiyyətinin yüksəldilməsi üzrə görülən konkret işlərdən də bəhs etmişdir.
Yeni vəzifəsində ilk səfərini məhz Azərbaycana etdiyini vurğulayan cənab Tomas Hammerberq ölkəmizdə baş verən demokratik dəyişiklikləri maraqla izlədiyini və səfərin onda böyük təəssürat yaratdığını bildirmişdir. O, sürətli sosial-iqtisadi inkişaf dövrünü yaşayan Azərbaycanda insan hüquqlarının təmin edilməsinə də xüsusi diqqət yetirildiyini razılıqla vurğulamış və uğurla aparılan genişmiqyaslı demokratik islahatları yüksək dəyərləndirmişdir.
Görüşdə hüquqşünas kadrların hazırlanması, hakimlərin tədrisi, məhkəmə fəaliyyətində beynəlxalq hüquq normalarının, o cümlədən Avropa İnsan Hüquqları Məhkəməsinin presedent hüququnun tətbiqi məsələləri geniş müzakirə olunmuş, bununla bağlı məhkəmə sisteminin müasirləşdirilməsinə dair Azərbaycan Respublikası Prezidentinin 2006-cı il 19 yanvar tarixli Fərmanının əhəmiyyəti xüsusi vurğulanmışdır.
Səmərəli fikir mübadiləsinin gedişində qonaqları maraqlandıran suallara əhatəli cavab verilmişdir. Onlar nazirlikdə yaradılmış “Ədliyyə tarixi” muzeyi ilə də tanış olmuşlar.
Həmin gün Avropa Şurasının insan hüquqları üzrə komissarı Hüquq Tədris Mərkəzində peşə hazırlığı keçən hakimliyə namizədlərlə görüşmüş, onların qarşısında çıxış etmişdir.
İnsan hüquqları üzrə müvəkkil Elmira Süleymanova tədbirlərdə iştirak etmişdir.
Bölmənin digər xəbərləri
