Azərbaycandan və Gürcüstandan gələn Səudiyyə Ərəbistanı vətəndaşlarında koronavirus aşkar edilməyib
Qahirə, 2 may, AZƏRTAC
Səudiyyə Ərəbistanının Kralı Salman bin Əbdüləzizin koronavirus pandemiyası ilə əlaqədar xaricdə yaşayan Krallığın vətəndaşlarının ölkəyə gətirilməsi təlimatına əsasən, növbəti aviareys Tbilisi və Bakıya təşkil edilib. Mayın 1-də Azərbaycan və Gürcüstandan çarter reysi ilə gələn təyyarə Kral Əbdüləziz Beynəlxalq Aeroportuna enib. AZƏRTAC xəbər verir ki, bu barədə rəsmi SPA informasiya agentliyi məlumat yayıb.
Məlumatda qeyd olunub ki, Tbilisi və Bakıdan Krallığın vətəndaşlarını gətirən “Saudi Arabian” aviaşirkətinin təyyarəsini aeroportda Xarici İşlər və Səhiyyə nazirliklərinin əməkdaşları qarşılayıblar. Sərnişinlər burada ilkin koronavirus testindən keçirilib və onların heç birində COVID-19 virusu aşkar edilməyib. Bununla belə, təlimata əsasən, Tbilisi və Bakıdan gətirilən insanlar Krallığın Turizm Nazirliyinin ayırdığı və Səhiyyə Nazirliyi tərəfindən tibb ləvazimatları ilə təchiz edilən xüsusi karantin otelinə aparılıblar.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
