Azərbaycanın bir gündə uğurla yekunlaşdırdığı antiterror tədbirləri hərb tarixində ilkdir – AÇIQLAMA
Bakı, 21 sentyabr, AZƏRTAC
Ermənilər Cənubi Qafqaza köçürüləndən sonra azərbaycanlılara qarşı hər zaman soyqırımı, terror və işğal siyasəti həyata keçirib. Onlar beynəlxalq hüququn ən ağır cinayətlərini törədiblər. Tarixi Azərbaycan torpaqlarından müxtəlif zamanlarda yüz minlərlə soydaşımız məcburi şəkildə köçürülüb. İyirminci əsrin əvvəlindən etibarən Azərbaycanın müxtəlif şəhərlərində yaşayan dinc, əliyalın əhaliyə qarşı vandalcasına soyqırımı törədilib, onlar böyük vəhşiliklə qətlə yetiriliblər. Həmin cinayətlər heç zaman Azərbaycan xalqının qan yaddaşından silinməyəcək.
Bunu AZƏRTAC-a açıqlamasında “Tərxis Olunmuş Hərbçilərin Gəncləri Maarifləndirmə" İctimai Birliyinin və “Qardaşlığımız Əbədidir” QHT Koalisiyasının sədri Emin Həsənli deyib. O qeyd edib ki, Ümummilli Lider Heydər Əliyevin ölkəmizə rəhbərliyi ilə Azərbaycanda güclü dövlət quruculuğu siyasəti həyata keçirilib. Dövlətimizin başçısı İlham Əliyev isə bu siyasətin layiqli davamçısıdır. Prezidentimiz ölkəmizi bütün sahələrdə dövrün müasir tələblərinə uyğun olaraq yüksək səviyyəyə qaldırıb. Xüsusilə, ordu quruculuğu sahəsinin inkişaf etdirilməsi məhz 44 günlük Vətən müharibəsindəki Şanlı Zəfərin əldə olunmasının əsas amilidir.
“Peşəkar ordu Azərbaycanın haqq işini beynəlxalq aləmdə qəbul etdirdi. Ulu Öndərin təməlini qoyduğu siyasət Zəfərə gedən yola işıq tutdu. Vətən savaşında Azərbaycan Ordusu dünyanın hərb tarixinə yeni səhifə yazdı. Düşünürəm ki, Azərbaycanın keçirdiyi birgünlük antiterror tədbirləri ABŞ, Böyük Britaniyada kimi ölkələrin hərbi dərsliklərində öz yerini almalıdır. Çünki mülki əhaliyə zərər vermədən qısa bir müddətdə yüksək səviyyəli hərbi tədbirləri digər ölkələr üçün nümunəvidir. Eyni zamanda, Azərbaycan diplomatiyasının digər bir qələbəsi antiterror tədbirlərinə üçüncü dövlətin daxil olmasının qarşısını almaq idi.
Ali Baş Komandan İlham Əliyev və rəşadətli Azərbaycan Ordusu 44 günlük Vətən savaşında Ermənistana bir daha başa saldı ki, onlar uzun müddət Azərbaycanda terror fəaliyyəti həyata keçirə bilməzlər. Müharibədən sonrakı dövrdə Prezidentimiz böyük humanistlik nümayiş etdirərək dəfələrlə bölgədəki qeyri-qanuni silahlı dəstələrin tərk-silah olmağa çağırdı. Ermənilər isə onlara göstərilən humanistliyə qarşı məkrli siyasətlərindən əl çəkmədilər. İndi isə onlar yalvararaq Azərbaycanın şərtlərini qəbul etmək məcburiyyətində qalıblar. Xankəndidə Azərbaycan vətəndaşlığını qəbul edən ermənilər bölgədə yaşaya bilərlər. Azərbaycan Qarabağda apardığı quruculuq işlərini Xankəndidə, Əsgəranda, Ağdərədə, Xocavənddə davam etdirəcək. Qısa zamanda həmin bölgələrin hər birində Azərbaycan bayrağı dalğalanacaq. Azərbaycanın bir gün ərzində uğurla yekunlaşdırdığı antiterror tədbirləri istər hərbi, istərsə də diplomatiya tarixində bir ilkdir. Bu, Ali Baş Komandanımızın və Azərbaycan xalqının uğurudur”, - deyə İctimai Birliyin sədri bildirib.
Bölmənin digər xəbərləri
