Azərbaycanın işgüzar dairələri Praqada keçiriləcək maliyyə-iqtisadi forumuna dəvət olunurlar
Bakı, 25 mart, AZƏRTAC
Aprelin 26-27-də Praqa şəhərində "Praqa işgüzar görüşləri" adlı maliyyə-iqtisadi forumu keçiriləcək.
Azərbaycanda İxracın və İnvestisiyaların Təşviqi Fondundan AZƏRTAC-a bildiriblər ki, forum MDB İcraiyyə Komitəsinin dəstəyi ilə MDB Maliyyə-Bank Şurası tərəfindən təşkil olunur. Forumda milli və kommersiya banklarının və birjaların rəhbərləri, maliyyə qurumları və bank birliklərinin nümayəndələri, o cümlədən innovasiya və investisiya şirkətlərinin rəhbər şəxslərinin iştirakı gözlənilir.
Forumun işgüzar proqramında MDB iştirakçı dövlətləri və Avropa İttifaqının maliyyə bazarlarının yeni qarşılıqlı əlaqə formatları, ixracın maliyyələşdirilməsi, rəqəmsal iqtisadiyyatın inkişafı, həmçinin inteqrasiyayönümlü investisiya layihələrinin təqdimatı məsələləri müzakirə olunacaq. Bununla əlaqədar olaraq, "Praqa işgüzar görüşləri” forumunun iştirakçıları iri biznesin nümayəndələri, investorlar və mütəxəssislərlə görüşmək imkanı əldə edəcəklər. MDB İcraiyyə Komitəsi Azərbaycanın işgüzar dairələrini tədbirdə iştiraka dəvət edir.
Bölmənin digər xəbərləri
