Səyyar ASAN xidmət Gürcüstanda vətəndaşlara xidmət göstərib – Reportaj
Tbilisi, 8 iyun, AZƏRTAC
İyunun 5, 6 və 7-də ölkəmizin Tbilisi şəhərindəki səfirliyində Azərbaycan vətəndaşlarına dövlət xidmətlərinin çatdırılması üçün Səyyar ASAN xidmət avtobusu vasitəsilə xidmət göstərilib.
AZƏRTAC xəbər verir ki, xüsusi avadanlıqlarla təchiz olunmuş səyyar avtobusda vətəndaşlar şəxsiyyət vəsiqələrinin verilməsi və dəyişdirilməsi, sürücülük vəsiqələrinin dəyişdirilməsi və məhkumluq barədə arayışların verilməsi xidmətlərindən yararlanıblar.
Layihə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Xarici İşlər Nazirliyinin birgə təşkilatçılığı, Diasporla İş üzrə Dövlət Komitəsinin isə dəstəyi ilə təşkil olunub.
Bu çərçivədə 500-ə yaxın vətəndaşın işi asanlaşıb.
Səyyar ASAN xidmətin gələcəkdə digər ölkələrdə də keçirilməsi nəzərdə tutulur.
Əsas məqsəd dövlət xidmətlərinin hər kəs üçün daha rahat, innovativ üsullarla və əlçatan şəkildə təqdim edilməsidir. Bu xidmət vətəndaş məmnunluğunu təmin etməklə yanaşı, dövlət xidmətlərinin daha geniş kütləyə sürətli və bərabər şəkildə çatdırılmasına imkan yaradır.
Asan xidmətin yardımından vətəndaşlarımız göstərilən diqqət və qayğıya görə Azərbaycan dövlətinə, xüsusən də Prezident İlham Əliyevə minnətdarlıqlarını bildiriblər.
Gürcüstanda nəqliyyat daşınmaları sahəsində çalışan Asim Qasımov AZƏRTAC-a müsahibəsində deyib: “Azərbaycan dövləti tərəfindən mənə verilmiş şəxsiyyət vəsiqəsinin vaxtı bitmək üzrə idi. Elektron qaydada qeydiyyatdan keçdim və bu gün səfirlikdə ASAN xidmət əməkdaşları yeni şəxsiyyət vəsiqəsi ilə təmin olunmağıma yardım etdilər. Bu həm maddi cəhətdən, həm də vaxt baxımından çox sərfəlidir. Buna görə, aidiyyəti dövlət qurumlarına və Prezident İlham Əliyevə təşəkkürümü bildirirəm”.
Artıq 31 ildir ki, Gürcüstanda yaşayan və Saqareco rayonunun Ləmbəli kəndində orta məktəbdə müəllim işləyən Ziyafət Qasımova da xidmətdən razı qalıb: “Gürcüstanda Azərbaycan vətəndaşlarına bu cür ASAN xidmət göstərmək dövlətimizin bizə olan yüksək diqqət və qayğısının bariz nümunəsidir. Səfirliyin əməkdaşları bizi xoş təbəssüm, gülər üzlə qarşıladılar. ASAN xidmət agentliyinin əməkdaşları da bizə xüsusi diqqət göstərirlər. ASAN Xidmət Agentliyinin əməkdaşları bizə sənədlərimizin yenilənməsi ilə yanaşı, bəzi məsələlər barədə də ətraflı məlumat verirlər. Bu cür xidmətə görə, Azərbaycan Prezidentinə, səfirliyə, ASAN Xidmət rəhbərliyinə, Xarici İşlər Nazirliyinə və Diaspora Komitəsinin rəhbərliyinə minnətdaram”.
Soydaşımız Ağəli Qocayev isə deyir: “Mən Gürcüstan vətəndaşıyam, həyat yoldaşım isə Azərbaycan vətəndaşıdır. Xeyli vaxt idi ki, Azərbaycana gedib, yoldaşımın şəxsiyyət vəsiqəsini yeniləmək istəyirdik. Müəyyən çətinliklər var idi. Sağ olsun Azərbaycan dövləti ki, dünyada yaşayan azərbaycanlılara, eləcə də Gürcüstanda yaşayan soydaşlarımıza və Azərbaycan vətəndaşlarına bu cür xidmət göstərir. Bu bizə göstərilən böyük diqqət və qayğıdır. Buna görə bu tədbirin bütün təşkilatçılarına minnətdarıq”.
Qeyd edək ki, ASAN xidmətin səyyar xidmətindən yararlananlar içərisindən ən kiçik yaşlının 4, ən böyüyünün isə 95 yaşı var idi.
Səfirlikdə insanlara hüquqi xidmətlə yanaşı, tibb xidməti də göstərilirdi. Gürcüstanın müvafiq sağlıq ocağının həkimləri səfirlikdə növbə ilə vətəndaşlarımıza tibbi xidmət göstəriblər.
Bölmənin digər xəbərləri
