AZƏRBAYCANIN İSTEDADLARI
İlayda Əliyeva
Bakı, 14 noyabr, Anara Axundova, AZƏRTAC
AZƏRTAC Azərbaycanın istedadları haqqında məqalələr silsiləsini davam etdirir. Növbəti həmsöhbətimiz gimnast, bir neçə respublika və beynəlxalq yarışların iştirakçısı və qalibi İlayda Əliyevadır.
İlaydanın 5 yaşı var. O, məktəbə getməyə hazırlaşır, hazırlıq dərslərinə gedir. Rəsm çəkməyi sevir və şahmatla maraqlanır, bir ildən çoxdur ki, gimnastika ilə məşğul olur, lakin belə qısa müddətdə ciddi nəticələr əldə edib.
Gənc idmançının anası Gülşad Əliyevanın sözlərinə görə, bədii gimnastika həmişə onun xoşuna gəlib və o, qızını bu idman növünə verməyi xəyal edib. O deyir: “Dörd yaşında İlaydanı seksiyaya gətirdim, məşqlər 2-3 ay davam etdi, amma həvəsi yox idi. O, çox həssas və emosional qızdır. Onu razı salmağa çalışırdım, lakin getmək istəmirdi”. Sonra isə onu başqa kluba yazdırdım. Bu dəfə uşaqda maraq yarandı. Orada başqa məşqçi var idi - Fərid Kazakov. Gördüm ki, qızımda onunla məşğul olmaq arzusu var. Dərsdən-dərsə bu maraq artırdı və mən buna çox sevinirdim”.
İstedadlı gimnastın anasının qeyd etdiyi kimi, qızını bədii gimnastikaya yazdıranda o, yarışlarda iştirak etmək barədə düşünmürdü və İlaydanın idmanla sağlamlığı üçün məşğul olmasını istəyirdi.
“Bu idman növü qamət, elastiklik üçün yaxşıdır. Amma həm Fərid, həm də digər məşqçi Emiliya Nurəliyeva onun böyük potensiala malik olduğunu bildirdilər və qızımı irəli çəkməyə başladılar. O, bütün tələblərə çox yaxşı cavab verirdi. Məşqlərlə yanaşı, evdə də hərəkətlərin üzərində işləməyə başladı, məndən bunu lentə alıb məşqçiyə göndərməyimi istəyirdi”, – deyə Gülşad xanım gülərək qeyd edir.
İlaydanın ilk çıxışı məşqlərə başladıqdan 4 ay sonra oldu. Bunlar yerli yarışlar idi. Qız sadə rəqs ilə çıxış etdi. Dörd yaşında səhnəyə çıxmaq onun üçün ilk sınaq oldu. Balaca idmançı bu sınaqdan uğurla çıxdı və debütdən cəmi bir neçə ay sonra beynəlxalq yarışlarda iştirak etmək üçün Dubaya getdi.
İlaydanın anası deyir: “Mən bütün bunların çox tez olduğunu düşünürdüm, amma məşqçilər məni onun bacaracağına inandırdılar. O, orada birinci yeri tutdu, ilk qızıl medalını aldı. Mən bunu gözləmirdim, düşünürdüm ki, uşaq bu səviyyəli yarışlara qatılmazdan əvvəl 2-3 il məşq etməlidir!”
Dubaydakı uğurundan sonra İlaydanın valideynləri onun gimnastika ilə məşğul olması barədə ciddi düşünməyə başladılar. Qız daha intensiv məşq etməyə başladı. O, həyəcanın öhdəsindən gələrək televiziyada uğurla çıxış etdi. Sonra Azərbaycanda keçirilən həm regional, həm də beynəlxalq yarışlarda iştirak etdi, orada dəfələrlə qalib gəldi, iki rəqslə Gürcüstana getdi və oradan iki qızıl medalla qayıtdı. Bundan əlavə, balaca gimnast Pekində keçirilən beynəlxalq yarışlarda da iştirak edib.
Gülşad xanımın sözlərinə görə, İlayda gimnastika ilə məşğul olandan sonra çox intizamlı və məqsədyönlü oldu. Qızın gələcəyinə gəlincə, anası hesab edir ki, nə ilə məşğul olacağını özü seçməlidir.
“Hansı sahəni seçməsindən asılı olmayaraq, həyat yoldaşımla birlikdə ona dəstək olacağıq. Bu, valideyn kimi bizim borcumuzdur. Əgər o, peşəkar gimnast olmaq istəyərsə, biz onun arxasında duracağıq, hansısa başqa bir peşə seçmək istəyərsə, yenə dəstək göstərəcəyik. Əsas odur ki, insan sevdiyi işlə məşğul olsun”, – deyə Gülşad xanım qeyd edir.
İlayda söhbətə qoşulur: “Gimnastika mənim çox xoşuma gəlir, 8 medalım var - 7 qızıl və bir gümüş. Mən məşqi, musiqi sədaları altında rəqs etməyi sevirəm. Məşqçim Fərid müəllim çox xoşuma gəldi, çünki ilk gündən mənimlə nəzakətli davranırdı. Emiliya xanım adlı daha bir məşqçim var, o da çox yaxşı insandır”.
Balaca gimnast deyir: “İlk medalımı Dubayda aldım. Hiss etdim ki, hamı mənə görə şaddır. Medal almayanda isə pərt oluram. Amma məşqçi buna görə məni danlamır. Çıxışdan əvvəl bir az həyəcan keçirirəm. Rəqs edəndə həyəcanı unuduram, rəqslə, musiqi ilə diqqətimi yayındırıram. Məşqçi isə həmişə çıxışdan əvvəl mənə deyir: “Sən yaxşı rəqs edəcəksən!”.
İlayda deyir ki, həkim olmaq istəyir.
“Mən balaca olanda yanğınsöndürən olmaq istəyirdim. İndi isə həkim olmaq arzusundayam, anamı, atamı və nənəmlə babamı müalicə edəcəyəm. Bir də şahmatdan xoşum gəlir. Mən fiqurların necə hərəkət etdiyini bilirəm. Rəsm çəkməyi də sevirəm. Səni çəkməyimi istəyirsən?” – deyə qız anasından telefonu alıb rəsm proqramında çəkməyə başlayır.
İlayda çox maraqlı bir portret çəkdi, onu Gülşad xanım mənə yadigar olaraq göndərdi.
Söhbətimizdə İlaydanın məşqçisi - azərbaycanlı və rusiyalı quruluşçu xoreoqraf, rəqqas, balet artisti, Bakı Xoreoqrafiya Akademiyasının və Moskva Dövlət Mədəniyyət İnstitutunun məzunu, “World Dance Olympiad” (“Dünya Rəqs Olimpiadasının”) mütləq çempionu, iki dəfə Azərbaycan milli mükafatının laureatı, iki dəfə “Solo Star Russia” titulunun sahibi, üç dəfə Rusiyanın ən yaxşı solisti, Türkiyənin “Türkiye Zirve Ödulleri” milli mükafatı laureatı, beynəlxalq, ümumrusiya və respublika müsabiqələrinin və Qran-Prisinin çoxsaylı qalibi Fərid Kazakov da iştirak edir.
“İlayda çox həssas idi. Onun üçün hər şey maraqlıdır. Eyni zamanda, o, çox çalışqan və diqqətlidir, mən bunu uşaqlarda dərhal müşahidə edirəm”, - deyə Fərid Kazakov şagirdi haqqında danışır. - Valideynlərin dəstəyi məni heyran etdi və çox sevindirdi. Birgə tandemimiz isə belə qısa müddət ərzində heyrətamiz nəticələr verdi”.
Məşqçinin sözlərinə görə, qızın həmin vaxt cəmi altı ay idmanla məşğul olmasına baxmayaraq, Dubayda İlaydadan yaxşı nəticələr gözləyirmiş.
“Biz onun yaxşı keyfiyyətləri üzərində çox çalışdıq. Narahat olduğum tək şey artistlik idi. Çünki gülümsəmək onun üçün asan deyildi. Amma indi gülümsəməyə başlamışıq, artıq bizi dayandırmaq olmaz”, – deyə Fərid Kazakov gülərək bildirir. - İlayda məni həmişə nəticələri ilə sevindirib. Sonra Gürcüstan, Pekin, Azərbaycanda beynəlxalq yarışlar oldu”.
Gənc idmançının gələcəyindən danışan məşqçi, qızın anası kimi, bu qərarı İlaydanın özünün verməli olduğunu hesab edir.
Fərid Kazakov vurğulayır. “O, çox istedadlı uşaqdır. İstərdim ki, mənim davamçım olsun... Amma hansı yolu seçərsə-seçsin, əsas odur ki, xoşbəxt olsun. Gələcəkdə kim olmasından asılı olmayaraq, idman ona həyatda kömək edəcək. Çünki idman bir intizamdır. Həm də sağlamlıqdır”.
Bölmənin digər xəbərləri
