Azərbaycanın Moldovadakı səfirliyində Xocalı faciəsinə həsr olunmuş tədbir keçirilmişdir
Kişineu, 26 fevral (AZƏRTAC). Fevralın 26-da Azərbaycanın Moldovadakı səfirliyində Xocalı soyqırımının 22-ci ildönümü ilə əlaqədar olaraq tədbir keçirilmişdir.
Mərasimin əvvəlində diplomatik nümayəndəliyin binasında Azərbaycan xalqının ümummilli lideri Heydər Əliyevin büstü önünə tər çiçəklər düzülmüşdür. Axı məhz Ulu Öndər hakimiyyətə qayıtdıqdan sonra Xocalı faciəsinə siyasi-hüquqi qiymət verilmişdir.
Səfirliyin ərazisində 22 il bundan əvvəl törədilmiş qanlı hadisələri əks etdirən stendlər quraşdırılmışdır. Faciə qurbanlarının xatirəsinə şamlar yandırılmış, bir dəqiqəlik sükut elan edilmişdir.
Mərasimdə Moldova Respublikasının müdafiə naziri Vitali Marinutsa, ölkə parlamentinin vitse-prezidenti Oleq Bodruq, DİN-in Baş qərargahının rəisi Vladimir Tsurkan, XİN-in departament rəhbəri Nikolay Mınya, müdafiə və təhlükəsizlik məsələləri üzrə parlament komissiyasının sədri Aleksandr Stoyanoqlo, liberal-islahatçılar partiyasının lideri, deputat, tanınmış şair, Nizami Gəncəvinin əsərlərini rumın dilinə tərcümə etmiş İon Xodırke, Moldovanın keçmiş baş naziri Vasili Tarlev, dövlət orqanlarının nümayəndələri, diplomatlar, Moldova Azərbaycanlıları Konqresinin fəalları və başqaları iştirak etmişlər.
Tədbirdə Azərbaycanın Moldovadakı səfiri Namiq Əliyev çıxış edərək demişdir ki, Xocalı faciəsi ermənilərin azərbaycanlılara qarşı törətdikləri mənhus cinayət kimi xalqımızın yaddaşında silinməz iz buraxmışdır.
Diplomat qeyd etmişdir ki, Dağlıq Qarabağ münaqişəsi, Xocalı soyqırımı ilə bağlı gerçəkliklərin beynəlxalq ictimaiyyətə çatdırılması sahəsində ümummilli lider Heydər Əliyevin siyasi kursunu bu gün Prezident İlham Əliyev müvəffəqiyyətlə davam etdirir. Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın elan etdiyi “Xocalıya ədalət!” beynəlxalq təbliğat və maarifləndirmə kampaniyası Qarabağ haqqında həqiqətin dünya ictimaiyyətinə çatdırılmasında uğurlu və uzaqgörən strategiyadır.
Tədbirdə Dağlıq Qarabağ münaqişəsi, o cümlədən Xocalı faciəsi haqqında ədəbiyyat paylanmışdır. Heydər Əliyev Fondunun nəşrləri diqqəti xüsusilə cəlb etmişdir.
Sonra ehsan verilmişdir.
Bir gün əvvəl fevralın 25-də səfir Namiq Əliyev Xocalı faciəsinin 22-ci ildönümü ilə əlaqədar Moldovanın populyar “vivavoce.md” televiziya internet-portalına geniş müsahibə vermişdir.
AZƏRTAC-ın xəbər verdiyi kimi, fevralın 21-də Moldovanın “Ekspert novostey” adlı nüfuzlu qəzetində Xocalı qırğını haqqında böyük material dərc olunmuşdur.
Zeynal Ağazadə
AZƏRTAC-ın xüsusi müxbiri
Kişineu
Bölmənin digər xəbərləri
