SİYASƏT
AZƏRBAYCANIN RUSİYADAKI SƏFİRİ MDU-DA 20 YANVAR FACİƏSİ İLƏ ƏLAQƏDAR ÇIXIŞ ETMİŞDİR
Moskva, 19 yanvar (AZƏRTAC). Azərbaycanın RF-dəki səfiri Polad Bülbüloğlu M.V.Lomonosov adına Moskva Dövlət Universitetinin tarix fakültəsinin diskussiya klubunun qanlı 20 Yanvar faciəsinin 20-ci ildönümünə həsr olunmuş növbəti iclasında iştirak etmişdir.
Səfir çıxışında bildirmişdir ki, 1990-cı il yanvarın 19-dan 20-nə keçən gecə xalq hərəkatını boğmaq üçün Bakıya sovet qoşunları kontingenti yeridilmiş və bu hadisə Azərbaycan tarixinə Qara Yanvar faciəsi kimi yazılmışdır. Dağlıq Qarabağ ətrafında yaranmış gərginlik vəziyyəti daha da ağırlaşdırırdı. Səfirin fikrincə, ordunun silahı öz xalqına tuşlaması dövlətin məhvə yuvarlanması deməkdir ki, bu da bir il sonra baş verdi. Sovet qoşunlarının Bakıya yeridilməsi tarixin elə bir dönəmində baş verdi ki, bu, nəhəng nüvə dövlətinin, böyük imperiyanın dağılmasına, onun ərazisində yaşayan xalqların başına olmazın müsibətlərin gəlməsinə səbəb oldu. Bir gecədə Azərbaycanda siyasətə heç bir aidiyyəti olmayan 137 dinc sakin amansızcasına qətlə yetirildi: “Dinc sakinlər siyasi oyunların və ölkənin siyasi rəhbərliyinin öz xalqına biganə münasibətinin qurbanı oldular”.
Azərbaycan dövlətinin və xalqının SSRİ-nin o vaxtkı rəhbərliyi ilə Rusiyanın indiki rəhbərliyini və dostluq münasibətləri bütün sahələrdə inkişaf edən və möhkəmlənməkdə olan xalqını əsla eyniləşdirmədiyini xüsusi vurğulayan diplomat demişdir: “Ancaq baş verənlər unudulmamalıdır. Biz bu faciənin obyektiv qiymətləndirilməsinə nail olmağa çalışacağıq. Xoşbəxtlikdən Azərbaycan bütün incikliklərin üstündən xətt çəkib Rusiya ilə mehriban qonşuluq münasibətlərini davam etdirmək kimi müdrik bir addım ata bilmişdir.
Sonra tələbələrin siallarına cavab verən Polad Bülbüloğlu Rusiya-Azərbaycan münasibətlərinin indiki vəziyyətini və perspektivlərini yüksək qiymətləndirərək bildirmişdir ki, Azərbaycan bütün sahələrdə Rusiya ilə münasibətlərin inkişafına böyük əhəmiyyət verir, MDB Dövlətlərarası Humanitar Əməkdaşlıq Fondunun işində yaxından iştirak edir. Səfir demişdir ki, yanvarın 1-dən Rusiyaya Azərbaycan qazı daxil olmağa başlamışdır və böhranın təsirinə baxmayaraq iqtisadi münasibətlər də yüksəlişdədir. Səfir bu il 65-ci ildönümü qeyd ediləcək faşizm üzərində böyük Qələbəyə Azərbaycan xalqının və bütün Azərbaycanın böyük töhfəsindən danışaraq demişdir ki, bu, ümumi şanlı tariximizin elə bir səhifəsidir ki, Azərbaycanda heç kim heç zaman həmin səhifəni yenidən yazmağa cəhd göstərməmişdir.
P.Bülbüloğlu Azərbaycan və Rusiya tarixçiləri tərəfindən Azərbaycan-Rusiya münasibətlərinin ümumi tarixi dərsliyinin yazılması ideyasına müsbət yanaşdığını bildirmiş, Azərbaycanda rus dilinə və rus mədəniyyətinə göstərilən diqqət və qayğıdan, ikitərəfli münasibətlərin digər cəhətlərindən ətraflı söz açmışdır.
MDU-nun prorektoru Nikolay Syomin, Postsovet Məkanının Öyrənilməsi Mərkəzinin baş direktopru Aleksey Vlasov diskussiya klubunun iclasında iştirakına və 20 Yanvar hadisələri, Azərbaycan tarixinin digər hadisələri və Rusiya-Azərbaycan münasibətlərinin perspektivləri barədə ətraflı söhbətə görə səfirə minnətdarlıqlarını bildirmişlər.
Asya Hacızadə
AZƏRTAC-ın xüsusi müxbiri
Moskva