Budapeşt, 21 sentyabr, Vüqar Seyidov, AZƏRTAC

Sentyabrın 19-u dövlətimizin ən yeni tarixinə daha bir şanlı səhifə kimi daxil olacaq. Həmin gün Azərbaycanın Qarabağ iqtisadi rayonunun ermənilər tərəfindən məskunlaşmış hissəsində həyata keçirilən lokal xarakterli antiterror tədbiri tarixə qızıl hərflərlə yazıldı! İyirmi dörd saatdan az bir müddətdə (bu, dünya tarixində rekord sayılır) Ermənistan silahlı qüvvələrinin hissələrinə (Ermənistan həmin hərbi birləşmələrinin ona məxsus olduğunu inkar edirdi) və terrorçulara elə bir zərbə endirildi ki, onların gələcəkdə müqavimət göstərməsinin heç bir mənası qalmadı, ermənilər üçün yeganə çıxış yolu isə öz həyatlarını xilas edərək ağ bayraq qaldırmaq oldu.

AZƏRTAC xəbər verir ki, görülmüş tədbirlər nəticəsində hələ də silahlı yaramazların gəzdiyi və dinc erməni əhalisini təhdid altında saxladığı Azərbaycan ərazisindəki rayonlar üzərində dövlətimizin suverenliyi bərpa olundu.

Qeyd etmək lazımdır ki, bu tədbirlər relyef baxımından çox mürəkkəb bir yerdə həyata keçirildi və Azərbaycanın güc strukturlarından yüksək məharət və peşəkarlıq tələb olunurdu. Bu keyfiyyətlər tam miqyası ilə nümayiş etdirildi və terrorçuların bir sutkadan da az müddətdə təslim olmaları xüsusi təyinatlı qüvvələrin və həmin tədbirlərə cəlb olunmuş digər qoşun növlərinin yüksək hazırlıq dərəcəsinin bariz nümunəsi oldu. XXI əsrə xas olan ildırımsürətli və yüksək texnologiyalı əməliyyatların nümunəsi bir daha bütün dünyaya nümayiş etdirildi. Azərbaycan Silahlı Qüvvələri göstərdi ki, 44 günlük müharibənin başa çatmasından dərhal sonra böyük işlər görülüb, hərbçilərimiz mürəkkəb “ev tapşırığını” yerinə yetirib, dövlətin milli təhlükəsizliyinin təmin olunması üzrə ən gözlənilməz vəzifələrin həllinə də hazır olublar.

Xüsusilə vurğulamaq lazımdır ki, dinc əhaliyə vurulan zərər nəinki minimum, həm də sıfır səviyyəsində olub. Azərbaycan Ordusunun rəhbərliyi Ali Baş Komandandan bir nəfər belə mülki şəxsin və mülki infrastrukturun zərər görməməsi üçün maksimal ehtiyatlılığa riayət olunması tapşırığını alıb. Sonra bu barədə hərbi qulluqçulara müvafiq əmr göndərilib. Tapşırıq tam şəkildə, necə deyərlər, “müsbət 5” qiymətlə yerinə yetirilib. Əlbəttə, ermənilərin cəfəng xəbərlər yayan bütün mənbələri “dəhşətli hadisələr” barədə əvvəlcədən hazırlanmış hansısa mətnlər dərc etməyə başladılar. Lakin gülməlidir ki, erməni oxucularının özləri də yazdıqları şərhlərdə həmin uydurma iddialara təkzib yazdı və redaktorlardan şayiələr yaymamağı xahiş etdilər.

Antiterror tədbirləri erməni terrorçularının havadarlarının diplomatik kanallarla Bakıya görünməmiş təzyiqi şəraitində və erməni lobbisi tərəfindən maliyyələşdirilən KİV-lərin növbəti qarayaxma kampaniyası fonunda həyata keçirilirdi. Lakin özünün haqlı mövqeyinə əmin olan Azərbaycan əsgəri əmri şərəflə yerinə yetirdi və Ali Baş Komandanın şanlı Ordumuz qarşısında qoyduğu hədəflərə nail oldu. Terrorçular böyük itkilər verdi, yüzlərlə silahlı yaramaz zərərsizləşdirildi, onlarla texnika vahidi məhv edildi, qalan silahları isə onlar qaldırdıqları ağ bayraqla birlikdə Azərbaycanın hüquq-mühafizə orqanlarına təhvil verməli olacaqlar.

Soruşmaq lazımdır, işləri bu dərəcəyə çatdırmaq nəyə lazım idi? Məgər əvvəlcədən bilmək olmazdı ki, 2020-ci il noyabrın 10-da imzalanmış üçtərəfli Bəyanatın 4-cü bəndi yerinə yetirilməmiş qalır və bu, əbədi olaraq davam etməyəcək. Bakı Ermənistandan daim bu bəndin yerinə yetirilməsini tələb etməyəcək və günlərin birində çoxsaylı xəbərdarlıqlar onlar üçün bu cür xoşagəlməz tədbirlərə gətirib çıxaracaq! Bunu dərk etmək çox çətin deyildi. Növbəti dəfə görürük ki, erməni rəhbərliyinin həm özünün korafəhmliyi və yeni “müttəfiqlər”, habelə “havadarlar” tapılması üzrə yanlış hesabları ölümlərə və anaların, qadınların və uşaqların göz yaşlarına səbəb olur. Məgər bu tədbirlər olmadan silahları təhvil vermək və öz həyatını qorumaq olmazdımı?

Mövcud olmayan “dövlətin” qondarma “prezident” seçkiləri, Ermənistanın baş nazirinin guya özünün də bir neçə dəfə açıq şəkildə imtina etdiyi (görünür qeyri-səmimi imtina edib) saxta rejimin yaradılmasının ildönümü ilə bağlı təbrik məktubu gərginliyi artıran yeni amil oldu. O, bir dəfə də Xankəndində mitinqdə çıxışı zamanı çox təhlükəli fikir söyləmişdi və sonra hər bir azərbaycanlı üçün müqəddəs olan Cıdır düzündə sərxoş vəziyyətdə rəqs etmişdi. Əgər bu “prezident” bir-iki həftədən sonra ağ bayraq qaldıracaqdısa, onda həmin mənasız seçkiləri keçirmək nəyə lazım idi? Üçtərəfli Bəyanatın 4-cü bəndini həyata keçirmək üçün Bakını güc tətbiq etməyə vadar edən amil kimi separatçıların ildönümü ilə bağlı təbrik kimə lazım idi? İnanmıram ki, erməni siyasətçilər özləri bu suallara cavab verə bilsinlər.

İndi Qarabağ ermənilərinin həyatında yeni səhifə açılır, onlar 30 il ərzində bu ərazilərin təbii ehtiyatlarını qarət etmək və dinc əhalini talamaq üçün öz məqsədlərini həyata keçirən xuntanın əsarətindən tezliklə xilas olacaqlar. Qarabağa qayda-qanun və Azərbaycan Konstitusiyasının müddəaları qayıdır. Qeyd etmək lazımdır ki, Azərbaycan Prezidentinin dünən xalqa müraciətində yenidən qeyd etdiyi kimi, dövlətimizin tamhüquqlu vətəndaşları olan Qarabağ erməniləri həyata keçirilən antiterror tədbirlərindən ən çox xeyir görən insanlardır. Məhz indi, Azərbaycanın hüquqi məkanına qayıtdıqları bir vaxtda, onlar Azərbaycanda yaşamağın nə olduğunu görəcəklər, “Azərbaycan vətəndaşı” fəxri adının bütün güzəştlərindən faydalanacaq, ciblərində Azərbaycan pasportu ilə dünyaya səyahət edəcək, darmadağın olmuş erməni ordusunun əvəzinə Müzəffər Azərbaycan Ordusunda xidmət etmək şərəfinə nail olacaqlar. Onların qarşısında əvvəllər görmədikləri imkanlar açılacaq. Bu şəxslərdən tələb olunan isə bir vətəndaş kimi, dövlətimizin qanunlarına hörmət etməkdir. Azərbaycanda yaşayan başqa etnik və dini qrupların nümayəndələrinin etdiyi kimi.

Bu gün Yevlaxda dialoq aparılır. Həmin dialoq bir vaxtlar Azərbaycanın Xocalı şəhərində keçirilib və sonra erməni separatçılarının və onların havadarlarının günahı üzündən dayandırılıb. Bu, Qarabağ ermənilərinin həyatında yeni səhifənin başlanğıcı olacaq.

Əgər proses davam edərsə, onda Ermənistanla sülh sazişinin tezliklə imzalanmasının yolu da açılacaq. Qisasçılıq tarixin zibilliyinə atılmalıdır. Yalnız Azərbaycanın beynəlxalq hüquq normalarına uyğun olan şərtlərinin yerinə yetirildiyi təqdirdə regionda sülh və tərəqqi hökm sürəcək. Azərbaycan dövlətinin başçısı bu barədə özünün dünənki çıxışında vurğulayıb.

Uzaq Avropada və okeanın o tayında olan qara qüvvələr sülh prosesinə çomaq soxmaqda davam edirlər. Yaxşı olar ki, İrəvan həmin tərəfə baxmasın. Çünki onun bugünkü bəlaları da məhz onlardan gəlir. Ermənistan uzaq “məsləhətçilərin” xidmətlərindən nə qədər tez imtina edərsə, Cənubi Qafqazda möhkəm sülh də o qədər tez bərqərar olar.

İndi isə nə vaxtsa atılmış daşları yığmaq vaxtıdır.