BAĞLAMADAKI TOZUN SİBİR XORASININ TÖRƏDİCİSİ OLUB-OLMADIĞI YOXLANILIR
AZƏRTAC-ın müxbiri xəbər verir ki, iyulun 11-də Ankaradakı mənzil tikintisi mərkəzinə içində ağ toz olan bağlama gəlmişdir. Bağlamanı açan mərkəz əməkdaşları bu tozun Sibir xorasının törədicisi olduğunu güman edərək, hadisə barədə dərhal yerli polisə məlumat vermişlər. Polis əməkdaşları bağlamadakı tozun həqiqətən qorxulu xəstəliyin törədicisi olmasından şübhələnmiş və onun açılmasında iştirak edən 18 nəfər xəstəxanaya aparılmışdır. Bağlamadakı toz Türkiyə sanitariya xidmətinin laboratoriyasında yoxlanılır. Laboratoriyanın mütəxəssisləri bildirmişlər ki, maddənin xarakteri barədə son nəticəyə gəlmək üçün azı 72 saat vaxt lazımdır. Bu vaxt ərzində tikinti mərkəzinin 18 əməkdaşı həkimlərin nəzarəti altında olacaqdır.
