“Baker Hughes”: ABŞ-dakı aktiv qazma qurğularının sayı 967-dir
Bakı, 29 iyun, AZƏRTAC
Birləşmiş Ştatlarda aktiv qazma qurğularının sayı dəyişməyib.
AZƏRTAC xəbər verir ki, bu barədə “Baker Hughes” şirkəti məlumat yayıb. Bildirilir ki, ötən hesabat həftəsində ABŞ-dakı aktiv neft və qaz qazma qurğularının sayı dəyişməyərək 967 olub. Keçən ilin eyni dövrü ilə müqayisədə ölkədəki aktiv qazma qurğularının sayı 80 ədəd azdır.
Ötən həftə ABŞ-dakı aktiv neft qazma qurğularının sayı 4 ədəd artaraq 793 olub. Aktiv qaz qazma qurğularının sayı isə 4 ədəd azalaraq 173-ə düşüb.
Qeyd edək ki, ABŞ-da aktiv neft qazma qurğularının sayı 1981-ci ildə ölkə tarixində maksimuma, yəni 4 min 530-a çatıb. Neftin qiymətinin ucuzlaşması fonunda ölkədəki aktiv neft qazma qurğularının sayı 2016-cı ilin may ayında isə minimuma - 316-ya geriləyib.
Bölmənin digər xəbərləri
