Bakı Beynəlxalq Kitab Sərgisi: Dərslik müəllifləri ilə “Yeni dərsliklər” mövzusunda müzakirələr aparılıb
Bakı, 14 noyabr, AZƏRTAC
Azərbaycan Respublikası Mədəniyyət Nazirliyinin təşkilatçılığı və “Caspian Event Organisers” şirkətinin dəstəyi ilə Bakı Ekspo Mərkəzində keçirilən 9-cu Bakı Beynəlxalq Kitab Sərgisində dərslik müəllifləri ilə “Yeni dərsliklər” mövzusunda panel müzakirələri keçirilib.
AZƏRTAC xəbər verir ki, paneldə çıxış edən filologiya üzrə fəlsəfə doktoru Rafiq İsmayılov beynəlxalq təhsil araşdırmalarının başlıca istiqamətindən birinin dərsliklərin keyfiyyəti olduğunu diqqətə çatdırıb. O bildirib ki, həm şagirdlər, həm də konkret fənlər üzrə dərs deyən müəllimlər üçün faydalı dərsliklər yazılmalıdır. O, məktəbəqədər hazırlıq dövrünün əhəmiyyətli olduğunu vurğulayaraq qeyd edib ki, həmin dövrdə verilən təhsil vasitəsilə uşaqların erkən yaş dövrlərində əqli, fiziki, yaradıcı potensialının inkişafının və mədəni səviyyəsinin yüksəldilməsinin, psixoloji dayanıqlılığının, estetik tərbiyəsinin, sadə əmək vərdişlərinə, zəruri həyati bacarıqlara yiyələnməsinin, ətraf aləmə, şəxsi sağlamlığın qorunmasına həssas və şüurlu münasibətinin, şəxsiyyətinin formalaşdırılmasının əsası qoyulur.
Riyaziyyat üzrə fəlsəfə doktoru, 193 nömrəli orta məktəbin riyaziyyat müəllimi Günay Hüseynzadə deyib: “Biz hazırda dünyaya, beynəlxalq aləmə inteqrasiya edirik. Buna görə də dərsliklərdə yazılan hər bir mövzu kifayət qədər müzakirə olunur. Qeyd etməliyəm ki, riyaziyyat fənnində uşaqların qarşılaşdığı ən böyük problemlər sırasında onların bunu sərbəst şəkildə həll edə bilməmələri ilə bağlı məsələdir. Ona görə də həm valideynlər, həm də şagirdlər üçün bu istiqamətdə müxtəlif maarifləndirici tədbirlərin keçirilməsi olduqca əhəmiyyətlidir”.
Bakı Mühəndislik Universitetinin müəllimi, “Həyat bilgisi və Təbiət” dərsliyinin həmmüəllifi Elşad Yunusov qeyd edib ki, hazırda məktəblərdə müəllimlər dərsləri şagirdlərlə sorğular şəklində keçirlər. Bu, şagirdlərə çalışmaların həll yolunun tapılmasında böyük kömək olur. Həyat bilgisi, biologiya, təbiət dərslikləri beynəlxalq standartlara uyğunlaşdırılaraq hazırlanır və müəllif-ekspert heyəti ilə dərs keçən müəllimlərin sıx əlaqəsini, əməkdaşlığını nəzərdə tutur. “Köhnə dərsliklər məzmun yüklü olur, şagirdlərin yaş xüsusiyyətlərini nəzərə alınmır. Lakin yeni dərsliklər şəxsiyyətyönümlü məzmunda hazırlanır. Yəni, şagirdlərin problemi anlayır, problemli situasiyanı özləri üçün bir növ aydınlaşdıra bilirlər”, - deyə E.Yunusov əlavə edib.
Tədbir digər müzakirələrlə davam edib.
Bölmənin digər xəbərləri
