ELM VƏ TƏHSİL
BAKI DÖVLƏT UNİVERSİTETİNDƏ AKADEMİK MUSA ƏLİYEVİN 100 İLLİYİNƏ HƏSR OLUNMUŞ ELMİ KONFRANS KEÇİRİLMİŞDİR
![](/media/newsimages/2008/May/file1211909636516.jpg)
Tədbir iştirakçıları, o cümlədən alimin doğmaları və yaxınları təhsil ocağındakı Faydalı qazıntılar muzeyi nəzdində mərhum akademikin vəsiyyətinə əsasən, onun zəngin kitabxanasının bazasında təşkil edilmiş “Musa Əliyev kabineti” ilə tanış olmuşlar.
Konfransı universitetin rektoru, Milli Məclisin deputatı, akademik Abel Məhərrəmov açaraq xatırlatmışdır ki, YUNESKO-nun Baş Konfransının 34-cü sessiyası 2008-2009-cu illərdə görkəmli şəxsiyyətlərin və əlamətdar hadisələrin qeyd edilməsi proqramına uyğun olaraq, Azərbaycanla bağlı yubileylərin keçirilməsi haqqında qərar qəbul etmişdir. Bununla əlaqədar Azərbaycan Prezidenti İlham Əliyevin 2008-ci il 31 yanvar tarixli Sərəncamına əsasən məşhur geoloq alim, akademik Musa Əliyevin də 100 illik yubileyi Azərbaycanda dövlət səviyyəsində keçiriləcəkdir.
A.Məhərrəmov qeyd etmişdir ki, akademik Musa Əliyev görkəmli ictimai və dövlət xadimi, bacarıqlı elm təşkilatçısı, məşhur neftçi-geoloq, dünya miqyaslı alim-stratiqraf idi. O, Qafqazın geologiyasının öyrənilməsində tanınmış alim, Tabaşir dövrünün stratiqrafiyası və paleontologiyasının araşdırılmasında öz dəst-xəttini qoymuş, böyük elmi məktəb yaratmış geoloq idi. Tabaşirin sistematikası və stratiqrafik cəhətdən yayılmasına, habelə paleontologiya, biostratiqrafiya və paleocoğrafiya məsələlərinə həsr olunmuş əsərləri alimi dünya geologiya elmində məşhur etmişdir.
Bakı Dövlət Universitetinin faydalı qazıntılar kafedrasının müdiri, AMEA-nın müxbir üzvü, professor Vasif Babazadə “Akademik Musa Mirzə oğlu Əliyev və Azərbaycanda geologiya elminin inkişafı” mövzusunda məruzə etmişdir.
Məruzəçi Musa Əliyevin keçdiyi şərəfli həyat yolu barədə məlumat vermiş, bildirmişdir ki, o, bitirdiyi indiki Dövlət Neft Akademiyasında laborantlıqdan AMEA-nın prezidenti vəzifəsinədək yüksəlmiş, akademiyaya 8 il rəhbərlik etmişdir. Akademiyanın prezidenti işlədiyi müddətdə Musa Mirzə oğlunun baş redaktorluğu altında 7 cildlik “Azərbaycanın geologiyası” monumental əsər çap olunmuşdur. Elmin müxtəlif sahələrində fərqlənən kadrları sərraf gözü ilə seçərək Moskvaya, Sankt-Peterburqda və keçmiş ittifaqın digər nüfuzlu elmi mərkəzlərinə göndərən Musa Əliyev onların gələcək inkişafını da nəzərdən qaçırmırdı. Hazırda elmimizin korifeyləri hesab edilən akademiklərdən Budaq Budaqov, Asəf Nadirov, Cəmil Quliyev, Musa Musayev, haqq dünyasına qovuşmuş Əliəşrəf Məmmədov, Səttar Əsədov, AMEA-nın müxbir üzvü Niyazi Səmədov və bir çox başqalarının sonralar görkəmli alim kimi formalaşmalarında, heç şübhəsiz, Musa Əliyevin böyük xidməti olmuşdur.
Akademik Musa Əliyevin elmi fəaliyyəti nəticəsində planetimizin keçmiş həyatı haqqında çox dəyərli məlumatlar əldə olunduğu, Kiçik Qafqazın şimal-şərq yamacının çay hövzələrində şlixyuma - axtarış işləri apararaq, bu çaylarda səpinti qızıl toplantılarını aşkar etdiyi bildirilmiş, həyatının Moskva və Əlcəzair mərhələsi barədə söz açılmışfdır. Məlumat verilmişdir ki, Musa Əliyev Əlcəzairdə neft-qaz yataqlarının axtarışı və proqnozlaşdırılması ilə bağlı SONATRAK Dövlət Birliyi ilə bağlanılmış iri müqaviləyə rəhbərlik etmişdir. Bir qədər sonralar Əlcəzair Atlaslarında - Mərkəzi Atlas, Şərqi Atlas, Cənubi Tel və Qərbi Tel coğrafi zonalarında eyniadlı 4 neft-qazlı hövzənin aşkar edilməsi Musa Əliyevin verdiyi proqnozun elmi cəhətdən nə qədər əsaslandırılmış olduğunu göstərmişdir.
Vurğulanmışdır ki, akademik böyük elmi məktəb yaratmış, onun rəhbərliyi altında 50-ə yaxın elmlər doktoru və namizədi hazırlanmışdır. Akademik M.Əliyev 250 elmi əsərin, o cümlədən 20-ə yaxın monoqrafiyanın müəllifidir. Alimin bilavasitə iştirakı və redaktorluğu ilə müxtəlif miqyaslı xəritələr, o cümlədən Azərbaycanın geoloji xəritəsi çap olunmuşdur.
Akademiklər Budaq Budaqov, Xoşbəxt Yusifzadə alim haqqında xatirələrini danışmışlar. Xarici işlər nazirinin müavini, Diplomatik Akademiyanın rektoru Hafiz Paşayev Əliyevlər ailəsi adından tədbirin təşkilatçılarına və iştirakçılarına təşəkkür etmiş, “Akademik Musa Əliyev adına kabinet”ə kompyuter dəsti bağışlamışdır.
Konfrans öz işini bölmə iclaslarında davam etdirmişdir. İki bölmədə 60-dan artıq məruzə dinlənilmişdir.
######
![]() |
![]() |