Bakı, 23 avqust, AZƏRTAC

Bakı metropoliteninin vaqonların əsaslı təmiri xidmətində daha bir qatarın orta təmirinə başlanılıb. Vaqonlar təmir dövründə modernləşdirilir - idarəetmə sistemi avtomatlaşdırılır və dövrün standartlarına uyğun qurulur.

AZƏRTAC xəbər verir ki, bu barədə jurnalistlərə açıqlamasında Vaqonların əsaslı təmiri xidmətinin baş mühəndisi Zaman Hacıyev bildirib.

O qeyd edib ki, son illərin statistikasına əsasən, nasazlıqların azalmasında modernləşdirmənin xüsusi çəkisi var. Belə ki, təmirə saxlanılmış qatarın vaqonaltı hissələri sökülüb və hazırda təftiş edilir. Mexaniki qovşaqlar, o cümlədən arabacıq və təkər cütləri yoxlanılır. Normativlərə əsasən, vaqonlar yuyularaq korroziyadan təmizlənib. Rəngləmə və digər kosmetik işlər də yerinə yetirilib: “Ümumən, qumla təmizləmə, yuyulma və rəngləmə bokslarında - ekoloji tələblərə uyğun, hermetik sahələrdə aparılır. Növbəti mərhələ çərçivəsində mexaniki, pnevmatik və elektrik hissələrdə işə başlanılıb. Hazırda elektrik xətləri çəkilir. Vaqonlarda dartı qüvvəsini tənzimləyən rele və kontaktorlar bloku yenilənəcək, hava sistemini qidalandıran kompressor aqreqatı müasir, səssiz və məhsuldar analoqları ilə əvəzlənəcək. Modernləşdirmə prinsiplərinə uyğun, sonrakı mərhələdə idarəetmə sistemi avtomatlaşdırılacaq. Bununla maşinist paneli, müasir qatarlarda olduğu kimi, bütün prosesləri elektron qaydada göstərəcək. Başqa sözlə, nasazlıqların baş verməzdən əvvəl qarşısının alınmasına qədər, bu yeniliklər qatarın təhlükəsizliyinə zəmanət verir. Bununla maşinistin köməkçisi olan avtomat sistem idarəetməni asanlaşdırır və daha etibarlı edir”.

Həmçinin nəzərə çatdırılıb ki, Bakı metropolitenində daha bir qatarın modernləşdirmə ilə orta təmiri yerinə yetirilib. 2014-cü ildən mərhələ ilə təmir həcmi genişləndirilən və 2017-ci ildən yeni inşa olunmuş sexdə aparılan orta və əsaslı təmir işləri metropolitenin vaqon parkında sabitliyin saxlanması və istismar göstəricilərinin yüksəldilməsində əhəmiyyətli rol oynayır. Xəttə hazırlanan qatar orta təmirə dayandırılarkən tam defektoskopiya müayinəsindən keçirilib və əlavə işlərin həcmi müəyyən olunub. Vaqonlar əvvəlki təmir zamanı korroziyadan təmizlənərək rənglənib. Buna görə yalnız yan hissələrdə təmizləmə və rənglənmə işi aparılıb.

Bildirilib ki, vaqonaltı hissədə dartı qüvvəsini tənzimləyən relelər və kontaktor blokları yenilənib. Hava sistemini qidalandıran kompressor aqreqatı Almaniya istehsallı daha məhsuldar, müasir analoqları ilə əvəzlənib. Rezervuarlar texniki proseslərin tələbi çərçivəsində təmir edilib.

Modernizasiya çərçivəsində idarəetmə sistemi tamamilə yenilənib. Qatara avtomatik nəzarət sistemi tətbiq olunub. Sistem qatarın ümumi vəziyyəti, habelə vaqonaltı avadanlıqlardan daxil olan siqnalları emal edir və maşinist monitoruna ötürür. Bu yeniliklər innovasiyalar baxımından sonuncu nəsil qatarlarda tətbiq edilir. Bununla maşinistin qatarı rahat idarə etməsinə, vəziyyəti vaxtında və düzgün qiymətləndirməsinə, mümkün nasazlıqları öncədən müəyyənləşdirməsinə və qarşısını almağa kömək edir. Nəticədə, qatarın sərnişindaşıma təhlükəsizliyi dəfələrlə gücləndirilmiş olur.

Yeni sistem nəzarət güzgüləri və marşrut göstəricisinin də avtomatik nizamlama funksiyasını yerinə yetirir. Maşinist kabinasının havalandırma sistemi də yenidən qurulub. Bu, 4-8 saat iş başında olan maşinistin yeraltı yollarda iş yerinin rahatlığına və əmək məhsuldarlığına şərait yaradır.

Modernizasiya Sankt-Peterburqun “Spetsavtomatika” Mühəndis və İstehsal Mərkəzinin layihələri əsasında yerinə yetirilib. Təmir, sazlama və sınaq işləri zamanı, ehtiyac yarandıqda, layihə müəllifləri ilə audiovizual rabitə qurulur, müzakirələr, fikir və təcrübə mübadiləsi aparılıb.

Ümumən, metropoliten sistemində vaqonların 3 fərqli təmir növü var. Bu təmir növləri qatarın vəziyyətindən asılı olmayaraq, normativlərə uyğun mütləq şəkildə həyata keçirilir. Cari təmir 3 növə bölünür. Müxtəlif növ cari təmir işləri il ərzində hələlik 50 vaqonda aparılıb. Qatarlar orta təmirə təxminən 960 min, əsaslı təmirə təxminən 1 milyon 800 min kilometr məsafə qət etdikdən sonra saxlanılır.

Hazırda daha bir qatarda yuxarıda sadalanan modernləşdirmə yeniliklərinin tətbiqi ilə orta təmir işləri başlanıb. İlin sonuna qədər daha bir qatarın orta təmiri və modernizasiyası nəzərdə tutulub.