BAKIDA 5-Cİ XƏZƏR BEYNƏLXALQ BANKÇILIQ VƏ MALİYYƏ KONFRANSI KEÇİRİLİR
AZƏRTAC xəbər verir ki, aprelin 8-də Bakıda, “Avropa” mehmanxanasında İteka Kaspian MMM, eləcə də İTE Group PLC (Böyük Britaniya), İTE LLC Moskow (Rusiya) şirkətlərinin təşkilatçılığı ilə 5-ci Xəzər Beynəlxalq Bankçılıq və maliyyə konfransı işə başlamışdır.
Konfransın Azərbaycanda formalaşan səmərəli bank sisteminin daha da inkişafına təkan verəcəyini söyləyən iqtisadi inkişaf nazirinin müavini Sevinc Həsənova ümummilli lider Heydər Əliyevin rəhbərliyi ilə başlanmış və hazırda Prezident İlham Əliyev tərəfindən uğurla davam etdirilən iqtisadi islahatların öz bəhrəsini verdiyini vurğulamışdır. Bildirmişdir ki, təkcə cari ilin iki ayında ümumi daxili məhsul 13,4 faiz, əhalinin gəlirləri təxminən 31,5 faiz artmışdır.
S.Həsənova iqtisadiyyatın belə yüksək sürətlə inkişafında bank sektorunun da rolunu vurğulayaraq demişdir ki, 2008-ci il fevralın 1-ə olan məlumata görə, kredit təşkilatları tərəfindən ölkə iqtisadiyyatına 2,3 milyard manat və ya əvvəlki ilin müvafiq dövrü ilə müqayisədə təqribən 91 faiz çox vəsait ayrılmışdır. Ümumi kredit portfelində uzunmüddətli kreditlərin xüsusi çəkisi artaraq 65 faizi ötmüşdür.
Banklara etibarın artdığını deyən nazir müavini bildirmişdir ki, təkcə bu ilin 1 ayında əhalinin banklardakı əmanətləri ötən ilin müvafiq dövrü ilə müqayisədə 86,2 faiz çoxalmışdır. Respublikada bank olmayan kredit təşkilatları və mikromaliyyə bankları şəbəkəsi formalaşmışdır və onlar Beynəlxalq Maliyyə Korporasiyası, Qara Dəniz Ticarət və İnkişaf Bankı, Avropa Yenidənqurma və İnkişaf Bankı, Almaniyanın KfW bankı ilə əməkdaşlıq edirlər.
Sonra çıxış edən Azərbaycan Respublikasının Prezidenti yanında Qiymətli Kağızlar üzrə Dövlət Komitəsinin sədri Gündüz Məmmədov, Azərbaycan Banklar Assosiasiyasının prezidenti Eldar İsmayılov, Gürcüstan Banklar Assosiasiyasının prezidenti Zurab Qvasaliya, Qazaxıstan Banklar Assosiasiyasının vitse-prezidenti Marat Baytokov və Rusiya Banklar Assosiasiyasının vitse-prezidenti Anatoli Milyukov konfransın banklar, maliyyə təşkilatları və biznes qurumları arasında birbaşa dialoqun yaradılmasına imkan verəcəyini vurğulamışlar.
Konfrans iştirakçıları sonra sərgi ilə tanış olmuşlar.
Konfrans “Dünya maliyyə bazarında baş verən proseslərin Xəzər bölgəsinin maliyyə sektorunun inkişafına təsiri”, “İPO - üstünlüklər və çətinliklər. Azərbaycan qiymətli kağızlar bazarı və kommersiya banklarının bu bazarda iştirakı. Bank xidmətləri bazarında sekyuritizasiya imkanları” mövzularında geniş iclaslarla işini davam etdirmişdir.
Konfrans aprelin 9-da başa çatacaqdır.
######
 |
 |
