Bakı, 7 sentyabr (AZƏRTAC). Sentyabrın 7-də Bakı Dövlət Universitetinin (BDU) 90 illik yubileyi münasibətilə Avrasiya Universitetləri Həmkarlar İttifaqları Təşkilatları Assosiasiyasının (AUHİTA) XXII qurultayı işə başlamışdır.

Qurultay iştirakçıları əvvəlcə Fəxri xiyabana gələrək, ümummilli lider Heydər Əliyevin xatirəsini ehtiramla anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın məzarı üstünə də çiçəklər düzülmüşdür.

Qurultayda Azərbaycanın Dövlət himni səslənmişdir.

BDU-nun rektoru, Milli Məclisin deputatı, akademik Abel Məhərrəmov demişdir ki, 1919-cu il sentyabrın 1-də Azərbaycan Xalq Cümhuriyyəti Bakıda universitetin təsis edilməsi ilə bağlı qərar qəbul etmiş və onun nizamnaməsi təsdiq olunmuşdur. Bununla da, Avropa və Asiyanın qovuşuğunda yeni bir ali təhsil ocağı yaradılmışdır. BDU hər zaman Azərbaycanda mütərəqqi fikrin, milli düşüncənin mərkəzi olmuşdur. Burada dünya şöhrətli siyasi xadim Heydər Əliyev, yüzlərlə tanınmış alim, görkəmli diplomatlar təhsil almışlar. Beynəlxalq əlaqələri gündən-günə genişlənən BDU hazırda Avrasiya, Xəzəryanı ölkələr, Qara dəniz universitetləri (QDU) assosiasiyalarının üzvüdür. Universitet 2002-2004-ci illərdə QDU Assosiasiyasına çox uğurla rəhbərlik etmişdir. Bundan əlavə, BDU hazırda dünyanın tanınmış ali təhsil ocaqları ilə ikitərəfli müqavilələr əsasında elmi-texniki, müəllim-tələbə mübadiləsi sahəsində əməkdaşlıq edir. Prezident İlham Əliyevin təşəbbüsü ilə Azərbaycan təhsilinin Avropa təhsil məkanına inteqrasiyası üçün mütəmadi olaraq işlər görülür və Bolonya prosesinə keçid davam edir. Burada Bolonya prosesinin tələbləri çərçivəsində çoxsaylı islahatlar həyata keçirilmişdir.

BDU-da 12 ölkədən 1300 tələbənin təhsil aldığını diqqətə çatdıran rektor vurğulamışdır ki, bu ölkələr arasında Yaponiya, Çin, Türkiyə, İran və bir sıra Avropa dövlətlərindən olan tələbələr vardır. Burada təhsil almaq istəyində olan xarici ölkə gənclərinin sayı çoxdur, lakin tələbə yataqxanalarında Ermənistan-Azərbaycan, Dağlıq Qarabağ münaqişəsi nəticəsində doğma yurd-yuvalarından qaçqın düşmüş 7 minə yaxın soydaşımız müvəqqəti olaraq məskunlaşdığından müraciətlərə müsbət cavab verə bilmirik.

BDU-nun yubileyi ərəfəsində Bakıda işə başlayan qurultayın tarixi əhəmiyyətindən danışan rektor diqqətə çatdırmışdır ki, tədbirdə Avrasiya məkanını təmsil edən 8 ölkənin 50-dən çox universitetinin nümayəndəsi iştirak edir. Bu qurultay çərçivəsində mövcud tədris proqramları, dərs vəsaitləri, tələbə mübadiləsi barədə müzakirələr aparılacaqdır. İki gün ərzində tədbirlərdə BDU-nun təhsil sistemi ilə digər tanınmış xarici ölkələrin ali təhsil müəssisələrinin təhsil sistemindəki oxşar və fərqli cəhətlər müqayisə ediləcək, maraqlı məruzələr dinləniləcəkdir.

AUHİTA-nın və M.Lomonosov adına Moskva Dövlət Universitetinin (MDU) Birləşmiş Həmkarlar İttifaqı Təşkilatının sədri İqor Kotlobovski Abel Məhərrəmova Rusiya ilə Azərbaycan arasındakı elmi əlaqələrin inkişafındakı xidmətlərinə görə təmsil etdiyi təşkilatın medalını və xatirə hədiyyəsini təqdim etmişdir.

T.Şevçenko adına Kiyev Milli Universitetinin Həmkarlar İttifaqı Komitəsinin sədri Vladimir Tsvıx ölkələrimiz arasındakı sıx əlaqələrdən, alim və tələbə mübadiləsinin vacibliyindən danışmış, qurultayın işinə uğurlar arzulamışdır.

Qurultayda İqor Kotlobovski rəhbərlik etdiyi assosiasiyanın 22 illik fəaliyyətini əks etdirən geniş hesabat məruzəsi ilə çıxış etmişdir.

Natiq bildirmişdir ki, 1987-ci ilin sentyabrında MDU-da “Ali məktəb həmkarlar ittifaqı təşkilatlarının işinin yenidən qurulması təcrübəsi” adlı elmi-praktiki konfrans keçirilmişdir. Konfransda universitetlərin həmkarlar təşkilatlarının qarşılaşdığı problemlərə obyektiv reaksiya vermək məqsədi ilə ölkə universitetlərinin həmkarlar təşkilatlarının sədrlər şurası yaradılmasına dair qərar qəbul edilmişdir. Nəzərə alınmışdır ki, təcrübə mübadiləsi aparmaq üçün şuranın mütəmadi toplantıları keçiriləcəkdir. Ötən illər ərzində şuranın Mahaçqalada, Səmərqənddə, Qomeldə, Kalininqradda və digər şəhərlərdə qurultayları keçirilmişdir. 1997-ci ilin oktyabrında qurumun Moskvada keçirilən növbəti qurultayında təşkilatın AUHİTU adlandırılması ilə bağlı qərar qəbul edilmişdir. Bundan sonra da qurultay keçmiş SSRİ-nin müxtəlif şəhərlərində işini yüksək səviyyədə davam etdirmişdir. Hazırda assosiasiya MDB dövlətlərinin 60-dan çox klassik universitetini birləşdirir. Təşkilatın son illərdə keçirilən bütün qurultaylarında ali təhsilin beynəlmiləlləşməsi və qloballaşmasının doğurduğu sosial-iqtisadi problemlər diqqət mərkəzində durmuşdur.

Qurultayın ilk günündə BDU ilə MDU-nun həmkarlar ittifaqı komitələri arasında əməkdaşlıq haqqında müqavilə imzalanmışdır.

Tədbir çərçivəsində qurultay iştirakçıları Azərbaycan Həmkarlar İttifaqları Konfederasiyasında olacaq, Bakının görməli yerlərini gəzəcək və BDU ilə T.Şevçenko adına Kiyev Milli Universitetinin həmkarlar ittifaqı komitələri arasında əməkdaşlıq haqqında müqavilə imzalanacaqdır.

Qurultay öz işini sentyabrın 8-də davam etdirəcəkdir.

######