AZƏRTAC xəbər verir ki, avqustun 16-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.

“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan 20 tondan çox məhsul, o cümlədən 1,5 ton ət, 5,5 ton tərəvəz, 4,5 ton meyvə gətirilmişdir. Yerli fermerlər buraya bazar günü də müxtəlif çeşidli kənd təsərrüfatı məhsulları çıxaracaqlar. Qiymətlər bazardakından 20-25 faiz aşağı olmuşdur. Qoyun ətinin kiloqramı 4 manat 50 qəpiyə, mal əti 4 manat 20 qəpiyə, quş əti 3 manat 80 qəpiyə, bal 9-10 manata, armud 60 qəpik-1 manata, alma 30-40-60, çuğundur, yerkökü 70-80, pomidor, kartof, badımcan 20-30-40, soğan, kələm 50, yumurtanın bir ədədi 7-10, göyərtinin dəstəsi 10-15 qəpiyə satılırdı.

A.Şərifzadə küçəsində, metronun “İnşaatçılar” stansiyasının yaxınlığındakı yarmarkada alıcılara Salyan, Qusar, Dəvəçi, Oğuz, Astara və digər rayonlardan ümumilikdə 68 tondan çox kənd təsərrüfatı məhsulları təklif olunurdu. Kənd Təsərrüfatı Nazirliyinin və buraya məhsul gətirən rayonların icra hakimiyyətlərinin nümayəndələri alıcıların təkliflərini təhlil edir, növbəti satış yarmarkasına çıxarılacaq məhsulların həcmini müəyyənləşdirirdilər.

Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin, metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində təşkil olunmuş yarmarkalarda Ağdaş, Salyan, Sabirabad, Şəmkir, Kürdəmir, Salyan, Ağcabədi, Biləsuvar və digər rayonlardan gətirilmiş 328 tondan çox müxtəlif çeşidli məhsullar sakinlər tərəfindən həvəslə alınırdı. Təqaüdçülər qohumları ilə birlikdə ancaq burada bazarlıq etdiklərini, qiymətlərin münasib, məhsulların keyfiyyətli olduğunu bildirirdilər.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı, Binəqədi rayonunda 6 nömrəli Bakı Texniki Peşə Liseyinin qarşısındakı, Nərimanov rayonunda Əliyar Əliyev küçəsindəki, Suraxanıda “Günəş” ticarət mərkəzindəki, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkalarda Qazax, Ağsu, Balakən, Qobustan, Samux, Daşkəsən, Quba, Biləsuvar, Lənkəran, Cəlilabad, Bərdə, Goranboy və Ağstafa rayonlarının fermerləri satışa ümumilikdə 142 tondan çox ərzaq və kənd təsərrüfatı məhsulları gətirmişdilər. Bazarlıq edən şəhər sakinləri məhsulların qiymətlərinin onlar üçün sərfəli olduğunu söyləyirdilər.

Kənd Təsərrüfatı Nazirliyinin nümayəndələri demişlər ki, yarmarkada satılan məhsulların qiyməti bazardakından 30-35 faizə qədər ucuzdur. Alıcılar məhsulun qiymətindən və keyfiyyətindən razıdırlar. İstehsal etdikləri məhsulları sərfəli qiymətə maneəsiz satan fermerlər də yarmarkaların təşkilindən razılıqlarını bildirirlər.

######