İQTİSADİYYAT
Balakən və Zaqatala rayonlarının zəlzələdən zərər çəkmiş kəndlərində yeni sosial obyektlər istifadəyə verilmişdir
Balakən-Zaqatala, 30 oktyabr (AZƏRTAC). 2012-ci ilin mayında ölkənin şimal-qərb bölgəsində baş vermiş zəlzələnin nəticələrinin aradan qaldırılması istiqamətində Fövqəladə Hallar Nazirliyi (FHN) və aidiyyəti dövlət qurumları tərəfindən kompleks tədbirlər davam etdirilir.
AZƏRTAC xəbər verir ki, oktyabrın 30-da Balakən rayonunun Katex kəndində zəlzələ nəticəsində qəzalı vəziyyətə düşmüş körpələr evi-uşaq bağçası və Zaqatala rayonunun Göyəm kəndində tam orta məktəb üçün yeni inşa olunmuş binaların açılış mərasimləri olmuşdur. Balakən rayonunun Katex kəndində keçirilən açılış mərasimində bildirilmişdir ki, zəlzələ baş vermiş ərazilərdə həyata keçirilən kompleks tədbirlər Prezident İlham Əliyevin daim diqqət mərkəzindədir.
Qeyd olunmuşdur ki, Balakən rayonunda zəlzələ nəticəsində qəzalı vəziyyətə düşdüyü müəyyən edilmiş 842 fərdi evdən 739-u sökülərək yenidən tikilmiş və sakinlərə təhvil verilmişdir. Katex kəndində indiyədək 63 ailə yeni tikilmiş evlərə köçmüşdür. Eyni zamanda, rayonun zəlzələdən zərər çəkmiş Qarahacılı və Püştətala kəndlərində iki yeni məktəb binası, Gərəkli kəndində isə 8 mənzilli ev tikilib istifadəyə verilmişdir. Bundan əlavə, ötən ilin mayında və oktyabrında baş vermiş zəlzələlər zamanı evləri zərər görmüş 1450 ailəyə mənzillərində bərpa-gücləndirmə işlərinin aparılması üçün 7 milyon manata yaxın vəsait ödənilmişdir.
Çıxışlarda təbii fəlakətin nəticələrinin aradan qaldırılması istiqamətində dövlətimiz tərəfindən həyata keçirilən tədbirlər yüksək qiymətləndirilmiş, zərər çəkmiş əhaliyə göstərilən diqqət və qayğıya görə Prezident İlham Əliyevə minnətdarlıq ifadə olunmuşdur.
Uşaq bağçasının açılışını bildirən rəmzi lent kəsildikdən sonra mərasim iştirakçıları burada yaradılan şəraitlə tanış olmuşlar. Müasir standartlara uyğun inşa edilən ikimərtəbəli yeni uşaq bağçası 80 yerlikdir. Binada 4 məşğələ, 4 yataq otağı, mətbəx, musiqi zalı, həkim otağı və yardımçı otaqlar yerləşir. Bağça binası yeni inventar və avadanlıqla, o cümlədən yumşaq yataq dəsti ilə təmin olunmuş, həyəti tam abadlaşdırılmış, istirahət guşələri yaradılmışdır. Binada müasir istilik sistemi quraşdırılmışdır.
X X X
Həmin gün Zaqatala rayonunun Göyəm kəndində zəlzələ nəticəsində qəzalı vəziyyətə düşmüş tam orta məktəb üçün FHN tərəfindən inşa edilmiş 220 şagird yerlik yeni bina da şagirdlərin istifadəsinə verilmişdir.
Açılış mərasimində bildirilmişdir ki, indiyədək rayonun zəlzələdən zərər çəkmiş yaşayış məntəqələrində 4 minədək fərdi ev tikilib sakinlərə təhvil verilmişdir. Zəlzələ nəticəsində qəzalı vəziyyətə düşmüş 23 məktəb binasından artıq 18-i istifadəyə verilmişdir. Eyni zamanda, 4 məktəb binasının tikintisi başa çatdırılmış, bir məktəb binasının tikintisində isə tamamlanma işləri görülür. Bundan əlavə, zəlzələdən zərər çəkmiş 6 məktəb binasında bərpa-gücləndirmə işləri aparılmış, bir məktəb üçün 100 şagird yerlik yeni korpus tikilmişdir.
Tədbirdə hər cür şəraiti olan belə bir təhsil ocağı hədiyyə etdiyinə görə dövlətimizin başçısına minnətdarlıq ifadə edilmişdir.
Sonra mərasim iştirakçıları yeni binada yaradılan şəraitlə yaxından tanış olmuşlar. Müasir standartlara uyğun inşa edilən ikimərtəbəli məktəb binasında sinif otaqları, fənn kabinetləri, iki laboratoriya, akt və idman zalları yerləşir. Bina yeni məktəb mebeli və avadanlıqla təchiz edilmiş, həyətində idman meydançası salınmışdır.