“BANK STANDARD” QSC-NİN FAİZLİ ADLI SƏNƏDSİZ İSTİQRAZLARININ EMİSSİYA PROSPEKTİ QEYDƏ ALINMIŞDIR
AZƏRTAC xəbər verir ki, Azərbaycan Respublikasının Prezidenti yanında Qiymətli Kağızlar üzrə Dövlət Komitəsi «Bank Standard» QSC-nin ümumi məbləği 3 milyon manat, hər birinin nominal dəyəri 100 manat, istiqraz üzrə gəlirliliyi 15 faiz, tədavül müddəti 365 gün olan faizli adlı sənədsiz istiqrazların emissiya prospektini qeydə almışdır.
Emissiya prospektinə əsasən, yerləşdirmə kütləvi təklif üsulu ilə Bakı Fond Birjasında həyata keçiriləcəkdir. "Standard Kapital” MMC istiqrazların yerləşdirilməsində təminatçı vəzifəsində çıxış edir.
İstiqrazları əldə etmək istəyən şəxslər BFB-nin üzvü və broker lisenziyasına malik olan təşkilata müraciət edə bilərlər.
“Bank Standard” QSC-nin istiqrazlarının emissiya prospekti BFB-nin internet saytında yerləşdiriləcəkdir.
