BAVARİYANIN ƏYALƏT PARLAMENTİNƏ SEÇKİLƏR KEÇİRİLMİŞDİR
AZƏRTAC-ın xüsusi müxbiri xəbər verir ki, sentyabrın 28-də Almaniyanın ərazicə ən böyük əyaləti olan Bavariyada Landtaqa (əyalət parlamenti) seçkilər keçirilmişdir.
Xristian Sosialistlər Birliyi (XSB) 1962-ci ildən bəri ilk dəfə seçicilərin mütləq səs çoxluğunu qazana bilməmiş və 44,6 faiz səslə kifayətlənməli olmuşdur. Bununla da xristian sosialistlər 46 illik təkbaşına hakimiyyətdən sonra koalisiya tərəfdaşı axtarmağa məcburdurlar.
Almaniya Sosial-Demokratlar Partiyası seçkilərdə 18,9 faiz, Müstəqil Seçicilər hərəkatı 11,2 faiz, Almaniya Azadlıq Partiyası 7,2 faiz, Yaşıllar Partiyası 6,9 faiz və Sollar Partiyası 4,3 faiz səs toplamışdır.
Mütəxəssislər siyasi mövqelərinin yaxınlığına görə, XSB və Almaniya Azadlıq Partiyasının koalisiya yaradacığını daha real hesab edirlər.
Xatırladaq ki, Xristian Sosialistlər Birliyinin keçmiş sədri və Bavariyanın Baş naziri Edmund Ştoyberin rəhbərliyi altında partiya 2003-cü il parlament seçkilərində 60,7 faiz səslə qalib gəlmişdi.
Bölmənin digər xəbərləri
