BAXIŞ-MÜSABİQƏ KEÇİRİLİR
“Azərenerji” Açıq Səhmdar Cəmiyyətinin mətbuat xidmətindən AZƏRTAC-a bildirmişlər ki, respublikanın baş enerji idarəsi iş prosesini təkmilləşdirmək, iqtisadi və istehsalat göstəricilərini yaxşılaşdırmaq məqsədi ilə əməyin mühafizəsi və texniki təhlükəsizlik üzrə baxış-müsabiqə keçirir. Müsabiqəyə ilin sonunda yekun vurulacaqdır. Münsiflər heyəti energetika müəssisə və təşkilatlarında əməyin mühafizəsi və istehsalat zədələrinin qarşısını almaq istiqamətində həyata keçirilən profilaktik işlərin vəziyyəti, texniki təhlükəsizlik qaydalarına əməl edilməsi, iş yerlərində lazımi məişət şəraitinin yaradılması, sanitar-gigiyena və tibbi tələblərə ciddi riayət olunması sahəsində aparılan kompleks tədbirlərin nəticələrini qiymətləndirəcəkdir.
Bu məqsədlə yaradılan komissiya xüsusi geyim və təhlükəsiz cihazların sayının normativ sənədlərə uyğunluğunu, onların istehsalata yararlılığını, heyətin fövqəladə hallarda hərəkət etməsi üçün hazırlığının səviyyəsini də yoxlayacaqdır.
Qaliblərə pul mükafatı və diplomlar veriləcəkdir.
Bölmənin digər xəbərləri
