BDU - 107: təhsil, tələbə nailiyyətləri və insan kapitalı
Bakı, 1 sentyabr, AZƏRTAC
Bakı Dövlət Universitetində tədris prosesinin məzmununun yenilənməsi, innovativ metodologiyaların tətbiqi və tələbələrin elmi-tədqiqat fəaliyyətinə cəlb olunması inkişaf strategiyasının əsas komponentlərindəndir. Peşəkar kadr hazırlığı ilə yanaşı, azərbaycançılıq məfkurəsinə, milli-mənəvi dəyərlərə sadiq, vətənpərvər və sosial məsuliyyətli vətəndaşların yetişdirilməsi BDU-nun mühüm hədəflərindəndir. Bu məqsədlə dövlət gənclər siyasəti, Ulu Öndər Heydər Əliyev irsi, azərbaycançılıq ideyaları və milli-mənəvi dəyərlərin təbliği istiqamətlərində çoxsaylı tədbirlər həyata keçirilir.
Bu barədə AZƏRTAC-a BDU-dan məlumat verilib.
Qeyd edilib ki, tələbələrin akademik nailiyyətləri bu siyasətin mühüm nəticələrindəndir. 2025-ci ildə universitetin 16 tələbəsi Prezident təqaüdünə layiq görülüb. On tələbəyə “Həmkarlar İttifaqı təqaüdü” verilib. Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə icra olunan üçüncü “Maarifçi” tələbə-məzun təcrübə proqramını başa vuraraq nazirlik və tabe qurumların strukturlarında əmək fəaliyyətinə başlayan 20 nəfərdən 6-sı BDU məzunu olub.
Yüksək nəticə göstərən tələbələrin təşviqi məqsədilə 2025-ci ildə BDU Elmi Şurasının qərarı ilə “Birincilik” adlı məqsədli təqaüd təsis edilib. 2025/2026-cı tədris ilindən bakalavriat səviyyəsinə qəbul olunan və müxtəlif ixtisaslar üzrə 550-dən çox bal toplayan abituriyentlər arasından ən yüksək nəticə göstərmiş tələbələrə tədris ilinin sonunadək hər ay 200 manat məbləğində təqaüd verilir. Bu təşəbbüsün 2026/2027-ci tədris ilində də davam etdirilməsi nəzərdə tutulur. 2026/2027-ci tədris ili üzrə BDU-ya qəbul olunan tələbələrin 1169 nəfəri 500-dən, 504 nəfəri isə 600-dən yuxarı bal toplamış abituriyentlərdir.
Universitetin insan resursları və təhsil proqramları da yeni çağırışlara uyğun olaraq inkişaf etdirilir. Hazırda BDU-da 3 mindən çox əməkdaş, o cümlədən 1500 nəfərədək professor-müəllim heyəti və elmi işçi çalışır; onların 250-dən çoxu elmlər doktoru, professor, 800 nəfərə yaxını isə fəlsəfə doktoru, dosentdir. Bakalavriat səviyyəsində 76 ixtisas üzrə kadr hazırlığı həyata keçirilir.
Universitetdə əmək bazarının dəyişən tələblərinə uyğun yeni ixtisas və ixtisaslaşmalar yaradılır. 2026/2027-ci tədris ilindən bakalavriat səviyyəsində regionşünaslıq (Afrika üzrə) ixtisası üzrə kadr hazırlığına başlanılacaq. Eyni zamanda magistratura səviyyəsində əmək bazarının tələblərinə uyğun 42 yeni ixtisaslaşma üzrə tədris aparılacaq: süni intellekt, kriptologiya, qida kimyası, dərman kimyası, biotibbi materiallar, bioinformatika, dövlət idarəetməsində strateji kommunikasiyalar, beynəlxalq təhlükəsizlik, türk dövlətlərinin xarici siyasəti və inteqrasiya prosesləri, ictimaiyyətlə iş, klinik sosial iş, geoekologiya və digər ixtisaslaşmalar bu yenilənmənin müasir çağırışlara istiqamətləndiyini göstərir.
BDU məzunlarının dünyanın nüfuzlu universitetlərində təhsil imkanları da genişlənir. 2026-cı ildə 45 məzun “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”nın iştirakçısı adını qazanıb. 2026/2027-ci tədris ili üçün magistratura səviyyəsində xaricdə təhsil almaq hüququ qazanan 353 nəfərdən 40-ı, doktorantura səviyyəsində isə 22 nəfərdən 5-i BDU məzunudur.
BDU-nun nəzdində fəaliyyət göstərən “Gənc istedadlar” liseyinin məzunlarının nəticələri də bu akademik mühitin davamlılığını göstərir. Liseyin iki məzunu Dövlət Proqramının qalibi olub.
Bölmənin digər xəbərləri
