Bəhruz Məhərrəmov: Azərbaycan beynəlxalq təsisatları ikili standartlardan geri çəkilməyə vadar etdi
Bakı, 10 avqust, Səadət Hakıyeva, AZƏRTAC
Bəşəri məfhum olan insan və vətəndaş hüquq və azadlıqlarının təmin edilməsi imperativ tələbdir, heç vaxt dövlətin daxili məsələsi hesab edilə bilməz. Bu mənada qlobal mexanizmlərlə bəyan olunmuş hüquqların hamılıqla və səmərəli tanınması, o cümlədən həyata keçirilməsi bütün dövlətlərin ali məqsədi hesab edilir. Təəssüf ki, bu istiqamətdə fəaliyyətin hədsiz siyasiləşməsi fonunda son bir neçə onillikdə hüquq və azadlıqların səmərəli təminatı siyasi maraqlara qurban verilmiş, nəticədə bu sferada xoş olmayan vəziyyət yaranıb. Xüsusilə Ermənistana münasibətdə aparıcı beynəlxalq hüquq müdafiə təsisatlarının ikili standartları və hüququn siyasi maraqlara qurban verilməsi nəticəsində yaranan eybəcər mənzərəni illərdir aydın formada müşahidə etməkdəyik.
Bu fikirləri AZƏRTAC-a açıqlamasında Milli Məclisin deputatı Bəhruz Məhərrəmov söyləyib.
Deputat qeyd edib ki, Vətən müharibəsi dövründə Prezident İlham Əliyev Almaniyanın ARD televiziya kanalına müsahibəsinə də bu məsələni xüsusi olaraq qabartmaqla bu cür ikili standartlarla fəaliyyət göstərən təsisatların əsl mahiyyətini ifşa etdi. Dövlətimizin başçısı açıq formada vurğuladı ki, insan hüquq və azadlıqlarının müdafiə və təmin edilməsi ilə bağlı fəaliyyət göstərən əsas təşkilatlar “heç vaxt Ermənistanda insan haqlarının pozulması ilə bağlı heç bir şərh verməyiblər. Ermənistan həbsxanasında jurnalist öləndə, Ermənistanın əsas müxalifət partiyasının rəhbəri həbs edildikdə onlar səssiz idilər”. Gedişat göstərdi ki, dünyada qlobal təşəbbüskar kimi çəkisi və nüfuzu artan Azərbaycan ixtisaslaşmış beynəlxalq təsisatları dilemma qarşısında qoyaraq ikili standartlardan nisbətən geri çəkilməyə vadar etdi.
“Uzun müddətdən sonra nəhayət ki, 6 aparıcı beynəlxalq təşkilat və ABŞ Dövlət Departamentinin hesabatlarında Ermənistanda insan hüquq və azadlıqlarının vəziyyətinə dair nisbətən obyektiv yanaşma müşahidə olunmasına ikinci səbəb isə, heç şübhəsiz, bu ölkənin özündən qaynaqlanır. Ermənistanda artıq göz yumulması mümkün olmayan qanun pozuntusu halları artıq kütləvi hal alıb və bütün sahələri əhatələyir. Xüsusilə də mülki və siyasi hüquq pozuntularının dözülməz həddə çatmasının kökündə vəzifəli şəxslərin səlahiyyətlərindən sui-istifadə etmələri hallarının dayanması vəziyyəti daha da mürəkkəbləşdirir. Təsadüfi deyil ki, müstəqil beynəlxalq ekspertlər “İşgəncə və digər qəddar, qeyri-insani və ya ləyaqəti alçaldan rəftar və cəza hallarının səmərəli araşdırılması və sənədləşdirilməsinə dair İstanbul Protokolu”nun bütün göstərişləri üzrə İrəvanın vəziyyətini ümidsiz hesab edirlər”, - deyə B.Məhərrəmov vurğulayıb.
Deputatın sözlərinə görə, digər acınacaqlı vəziyyət medianın fəaliyyətinə qanunsuz müdaxilələrlə bağlıdır. Xüsusilə rəsmi olmayan məlumatın yayılmasına görə inzibati addımların müəyyən olunması və cərimə tədbirlərinin geniş tətbiqi bu ölkədə media azadlığını rəmzi məfhuma çevirib. Bu kimi hallar, eləcə də siyasi hüquqların təmininə yönələn ictimai səylərin boğulması nəticəsində pozuntuların total xarakter daşıması Prezident İlham Əliyevin təbirincə desək, bu günə qədər Ermənistanın törətdiyi pozuntulara göz yuman dairələrin özünü çətin duruma salıb. Aydındır ki, adıçəkilən dairələr vəziyyətin bu həddə çatacağını və prosesin bu qədər ictimailəşəyini düşünməmiş, bu dəfə də süni surətdə prosesdən yayındıraraq Ermənistanın “nüfuzu”nu qoruyacaqlarını güman etmişdilər.
“Görünən odur ki, son 9 ayda dəyişən reallıq Ermənistanı bu imkandan da məhrum etdi. İndi Paşinyanı demokrat, onun dövlət çevrilişini isə inqilabi yolla hüquq və azadlıqların daha münbit şəraitdə təmini perspektivi kimi sırımağa çalışan Soros mediasının yayılan hesabatlara hansısa don geydirməsi yəqin ki, xeyli zaman alacaq”, - deyə deputat fikirlərini yekunlaşdırıb.
Bölmənin digər xəbərləri
