Belçika gömrüyü 1200 kiloqram köpək balığı üzgəci müsadirə edib
Brüssel, 4 iyun, AZƏRTAC
Belçika paytaxtındakı “Zaventem” aeroportunda gömrük xidməti əməkdaşları köpək balığı üzgəclərinin böyük partiyasını müsadirə ediblər.
AZƏRTAC Brüssel polisinin məlumatına istinadla xəbər verir ki, qeyri-qanuni yük Liberiyadan gəlib və Honkonq üçün nəzərdə tutulub. Əməliyyat gömrük xidməti, Ərzaq Məhsullarının Təhlükəsizliyi üzrə Federal Agentlik və Federal Səhiyyə Departamenti ilə birgə aparılıb.
24 kisədə gizlədilən 1200 kiloqram üzgəc sənəddə “quru balıq” adı altında göstərilib. Hesablamalara görə, bu həcmdə yük üçün təqribən 2000-dək köpək balığı öldürülməlidir. Köpək balıqlarının bəzi növləri məhvolma təhlükəsi ilə üz-üzədir və bir çox ölkənin qanunları ilə müdafiə edilir.
Asiya ölkələrində köpək balıqlarının üzgəclərindən şorba hazırlamaq üçün istifadə olunur.
Vüqar Seyidov
AZƏRTAC-ın xüsusi müxbiri
Brüssel
Bölmənin digər xəbərləri
