Bərdədə seçkilərin demokratik, şəffaf və ədaləti keçirilməsi üçün lazımi şərait yaradılıb
Bərdə, 7 aprel, Tahir Ağaməmmədov, AZƏRTAC
Bərdə rayonunda aprelin 11-də ölkəmizdə keçiriləcək prezident seçkilərinə hazırlıq işləri başa çatıb. Seçkilərin demokratik, şəffaf və ədaləti keçirilməsi üçün 93 və 94 sayı seçki dairələrinin tərkibinə daxil olan seçki məntəqələrində lazımi şərait yaradılıb.
AZƏRTAC-ın bölgə müxbiri hər iki dairənin seçki məntəqələrində olub, məntəqə seçki komissiyalarının fəaliyyəti ilə maraqlanıb.
93 saylı Bərdə şəhər seçki dairəsi dairə seçki komissiyasının sədri Şakir Əliyev bildirib ki, dairənin tərkibinə daxil olan 50 seçki məntəqəsi üzrə 43 min 681 seçici qeydə alınıb. Seçki məntəqələrinin hamısında cari təmir işləri aparılıb. Bütün məntəqələr zəruri texniki vasitə və metodiki vəsaitlərlə, elektrik enerjisi, rabitə şəbəkəsi və yanğın təhlükəsizliyi ilə təmin olunub. Seçicilərin öz mövqelərini sərbəst şəkildə bildirmələri üçün kabinələr qoyulub. Seçki məntəqələrində katib və üzvlər, habelə seçkini izləyəcək beynəlxalq və yerli müşahidəçilər üçün yerlər müəyyənləşdirilib. Bu günədək 581 müşahidəçi dairə seçki komissiyasında qeydiyyatdan keçib.
Dairənin tərkibinə daxil olan 1 saylı seçki məntəqəsi Bərdə şəhər 5 nömrəli tam orta məktəbin binasında yerləşir. Digər seçki məntəqələri kimi, bu məntəqədə də səsvermə gününə hazırlıq işləri başa çatıb.
Məntəqə seçki komissiyasının sədri Xasay Əliyev deyib ki, dəqiqləşdirilmiş son siyahıya əsasən 1434 seçici qeydə alınıb. Onlardan 11 nəfəri seçkidə ilk dəfə iştirak edəcək gənclərdir. Məntəqədə seçkilərin şəffaf və demokratik keçirilməsi üçün hər cür şərait yaradılıb. Seçicilərə səsvermənin keçirilmə tarixi, vaxtı və yeri barədə bildirişlərin paylanması işi də başa çatdırılıb.
94 saylı Bərdə kənd seçki dairəsi dairə seçki komissiyasının sədri Asif Hüseynovun bildirdiyinə görə, dairənin tərkibinə daxil olan 54 seçki məntəqəsində 45 min 135 seçici var. Seçicilərdən 877 nəfəri ilk dəfə səs verəcək gənclərdir. 1274 seçicinin yaşı 80-100, 15 seçicinin yaşı isə 100-dən artıqdır. 30 saylı seçki məntəqəsində qeydə alınmış 124 yaşlı Səmərqə Allahverdiyeva nəinki rayonun, eləcə də respublikanın ən yaşlı seçicisidir. O, əvvəlki seçki kampaniyalarında olduğu kimi, bu seçkilərdə də iştirak etmək arzusundadır. Bu məqsədlə ailəsi tərəfindən məntəqə seçki komissiyasına müraciət olunub. Səsvermə günü Səmərqə nənənin yaşadığı evə daşınan seçki qutusu göndəriləcək.
Qaradəmirçi kənd tam orta məktəbin binasında yerləşən 45 saylı seçki məntəqəsi də seçkilərə hazırdır. Məntəqə seçki komissiyasının sədri Səyyarə Həsənovanın sözlərinə görə, məntəqə üzrə 1378 seçici qeydə alınıb. Artıq seçicilərə səsvermənin vaxtı və yeri barədə bildirişlər paylanılıb. Məntəqə səsvermə kabinələri, seçki qutuları ilə təmin olunub. Seçici siyahıları, təbliğat və təşviqat xarakterli plakatlar seçki məntəqəsinin girişində, nəzərəçarpacaq yerlərdə asılıb.
93 və 94 saylı seçki dairələrinin əhatə etdiyi digər məntəqələrdə də səsvermə gününə hazırlıq işləri seçki qanunvericiliyinin tələblərinə uyğun aparılıb. Səsvermə üçün hər cür şərait yaradılan, seçki günü lazım olacaq bütün avadanlıqlarla təchiz edilən məntəqələrdə gördüklərimiz onu deməyə əsas verir ki, aprelin 11-də Bərdə seçicilərinin öz iradələrini sərbəst və şəffaf şəkildə bildirmələri üçün lazımi şərait yaradılıb.
Bölmənin digər xəbərləri
