Beynəlxalq Risk və Texniki Təhlükəsizliyi İdarəetmə İnstitutunun nümayəndəsi ilə görüş keçirilmişdir
Bakı, 20 noyabr (AZƏRTAC). Azərbaycan Respublikası Dövlət Neft Şirkətinin (ARDNŞ) Təlim, Tədris və Sertifikatlaşdırma İdarəsində (TTSİ) Böyük Britaniyanın Beynəlxalq Risk və Texniki Təhlükəsizliyi İdarəetmə İnstitutunun Mərkəzi və Cənub Şərqi Asiya üzrə regional direktoru Həmid İbrahimi və “TWI Azərbaycan” şirkətinin rəhbəri Kərim Şəkuri ilə görüş keçirilmişdir.
AZƏRTAC xəbər verir ki, TTSİ-nin rəisi Fuad Süleymanov ARDNŞ-in beynəlxalq şirkətə çevrilməsi üçün həyata keçirilən tədbirlər, kadr hazırlığı proqramı haqqında məlumat vermiş, kadr potensialının müasirləşdirilməsi istiqamətində təlim kurslarının və praktiki seminarların təşkil edilməsinin əhəmiyyətindən danışmışdır.
Qeyd olunmuşdur ki, TTSİ tərəfindən keyfiyyət, əməyin mühafizəsi və təhlükəsizlik texnikası qaydaları, ətraf mühitin qorunması və başqa aspektlər üzrə kompleks təlimlərin keçirilməsi daim diqqət mərkəzindədir. Qeyd olunan sahələr üzrə tərəfdaşlarla birlikdə müntəzəm kursların təşkili, sertifikatlaşdırma və təcrübə mübadiləsinin aparılması məsələlərinə də toxunulmuşdur.
Həmid İbrahimi TTSİ ilə ikitərəfli əlaqələrin qurulmasından məmnun olduğunu söyləmiş, təmsil etdiyi qurumun Mərkəzi və Cənub Şərqi Asiya regionunda geniş şəbəkəyə malik olduğunu, xüsusən Malayziya və Türkiyədə fəaliyyət göstərən nümayəndəlikləri vasitəsilə beynəlxalq səviyyədə təlimlərin və sertifikatlaşdırmanın həyata keçirildiyini bildirmişdir. Daha sonra Beynəlxalq Risk və Texniki Təhlükəsizliyi İdarəetmə İnstitutunun nümayəndəsi ARDNŞ-in təlim ehtiyaclarına uyğunlaşdırılmış kurslar paketinin hazırlanaraq TTSİ təqdim olunacağını qeyd etmişdir.
Bölmənin digər xəbərləri
