İDMAN
Birinci Avropa Oyunlarının onuncu günü Azərbaycan gimnastlarının uğurlu çıxışları ilə yadda qalıb
Bakı, 22 iyun, AZƏRTAC
İyunun 22-də Azərbaycan Milli Olimpiya Komitəsində (MOK) “Bakı-2015” birinci Avropa Oyunlarının mükafatçıları olan Azərbaycan idmançıları ilə ictimaiyyət nümayəndələrinin ənənəvi görüşü keçirilib.
AZƏRTAC xəbər verir ki, tədbirdə çıxış edən gənclər və idman nazirinin müavini İsmayıl İsmayılov yarışların onuncu gününün Azərbaycan gimnastlarının uğurlu çıxışları ilə yadda qaldığını deyib. Qeyd olunub ki, lentlə fərdi çıxışlarda Azərbaycanı təmsil edən Marina Durunda gümüş, batut üzərində fərdi tullanma yarışlarında isə idmançımız İlya Qrişun bürünc medal qazanıblar. Bununla da Azərbaycan yığmasının hesabındakı medalların sayı 35-ə çatıb.
Nazir müavinin bildirib ki, idmançılarımız hər gün qələbələr qazanaraq tarix yazırlar. Bütün bu uğurlar isə dövlətimizin idmançılara göstərdiyi diqqət və qayğının nəticəsidir. Ötən il isə idmançılarımız ümumilikdə 805 medal qazanıblar. Bu qələbələr ümummilli lider Heydər Əliyevin əsasını qoyduğu idman siyasətinin Prezident İlham Əliyev tərəfindən uğurla davam etdirilməsi sayəsində mümkün olub.
“Azərbaycan gimnastları birinci Avropa Oyunlarında 7 medal qazanıblar. Bu da böyük uğurdur. Azərbaycanın birinci xanımı, “Bakı-2015” ilk Avropa Oyunları Təşkilat Komitəsinin sədri Mehriban Əliyevanın qayğısı sayəsində gimnastika ölkəmizdə inkişaf edir və gimnastlarımız parlaq qələbələrə imza atırlar”, - deyə İ.İsmayılov bildirib.
O, qarşıdakı yarışlarda idmançılarımızın ölkəmizi layiqincə təmsil edəcəklərinə, Azərbaycan bayrağını yüksəyə qaldıracaqlarına inamını ifadə edib.
Yarışların onuncu günündə Azərbaycana medal sevinci yaşadan gimnastlarımız Marina Durundaya və İlya Qrişuna MOK-un hədiyyələri təqdim olunub.
Marina Durunda deyib: “Uğurumu Azərbaycan xalqına həsr edirəm. Birinci Avropa Oyunlarında Azərbaycanı layiqincə təmsil etdiyim üçün çox xoşbəxtəm və bununla qürur duyuram. Azərbaycan Gimnastika Federasiyasının, məşqçilərin və azarkeşlərin dəstəyi olmadan medal qazana bilməzdim. Hər şey yüksək səviyyədə təşkil olunmuşdu, hazırlığımız üçün əla şərait yaradılmışdı”.
Gələcək planlarından danışan idmançı qeyd edib ki, qarşıda onu dünya çempionatı gözləyir və buna görə onun istirahət etməyə vaxtı olmayacaq.
İlya Qrişun isə ona göstərilən etimadı doğrultduğuna görə sevindiyini bildirib. İdmançı uğurlu çıxışına dəstək olan Azərbaycan Gimnastika Federasiyasının prezidenti Mehriban Əliyevaya təşəkkür edib.