Bakı, 21 sentyabr, AZƏRTAC

“Biz dünyanı təmizləyirik” Ümumdünya Aksiya Həftəsi və ya “Planeti tullantıdan təmizləyək” kampaniyası ilk dəfə 1993-cü ilin sentyabrında Avstraliya sakinləri tərəfindən keçirilib. Onlar kütləvi şəkildə okean çimərliklərini təmizləmək üçün aksiya təşkil ediblər.

AZƏRTAC xəbər verir ki, tədricən aksiyaya başqa ölkələr də qoşulublar və bu gün artıq dünyanın 100 ölkəsindən milyonlarla könüllü kampaniyanın iştirakçısına çevrilib.

Müxtəlif qitələrin sakinləri sentyabr ayında doğma şəhər və rayonlarında tullantıları toplamaq və çeşidləmək üçün xüsusi olaraq bir həftə vaxt ayırırlar. Bir çox şəhərlərdə təkrar emalın ekoloji və iqtisadi faydaları ilə bağlı maarifləndirici tədbirlər keçirilir. İnsanlar istirahət zonalarını, çimərlikləri, meşələri, parkları, gölləri, şəhərətrafı əraziləri və çayları tullantılardan təmizləyir, ağac əkir, sərgilər, konsertlər, mətbuat konfransları təşkil edirlər.

“Planeti tullantıdan təmizləyək” kampaniyasının aktuallığı son illər xüsusilə artıb. Hər il bəşəriyyət getdikcə daha çox “istehlakçı cəmiyyət”ə çevrilir. Orta hesabla, Yer kürəsinin hər bir sakini ildə təxminən 20 ton xammal sərf edir ki, bunun da böyük hissəsi – 97 faizə qədəri tullantılara gedir. Bu da artıq “tullantı dağları”nı əmələ gətirir. Onlar təkcə miqyası ilə vahimə yaratmır, həm də canlı orqanizmlərin sağlamlığı və həyatı üçün potensial təhlükə rolunu oynayırlar.

“Biz dünyanı təmizləyirik” Ümumdünya Aksiya Həftəsinin məqsədi insanların diqqətini ətraf mühitin çirklənməsi və planetin zibillənməsi problemlərinə cəlb etmək, o cümlədən planet sakinlərinin ətraf mühitin idarə edilməsi bacarıqlarını inkişaf etdirmək, ekoloji mədəniyyət və savadlılıq səviyyəsini artırmaqdır.

Azərbaycanda ekoloji durumun yaxşılaşdırılması, əhalinin bu sahədə maarifləndirilməsi və ətraf mühitə məsuliyyətli yanaşma vərdişlərini təbliğ etmək məqsədilə mütəmadi olaraq genişmiqyaslı aksiyalar keçirilir. Belə ki, elə bu ay - sentyabrın 1-dən 16-dək keçirilən “Xəzəri Qoruyaq!” ekoloji aksiyası Xəzərin Xaçmaz, Lənkəran, Astara, Şabran, Siyəzən, Neftçala, Sumqayıt və Bakı çimərliklərini əhatə edib. Paytaxtdakı Bilgəh çimərliyində yekunlaşan aksiyada 1500 könüllü təxminən 11 hektar ərazini 5 tondan çox tullantıdan təmizləyib.