BMT-NİN UŞAQ HÜQUQLARI KOMİTƏSİNİN SƏDRİ BAKIDA SƏFƏRDƏDİR

13.04.2006 [21:57]
Çap et
A⁺ A^-

AZƏRTAC xəbər verir ki, aprelin 13-də Ailə, Qadın və Uşaq Problemləri üzrə Dövlət Komitəsində Bakıda rəsmi səfərdə olan BMT Uşaq Hüquqları Komitəsinin sədri Yakob Eqbert Doek ilə respublikada fəaliyyət göstərən uşaq qeyri-hökumət təşkilatları nümayəndələrinin görüşü keçirilmişdir.

Komitənin sədri Hicran Hüseynova, bütün dünyada olduğu kimi, Azərbaycanda da uşaq problemlərinin mövcud olduğunu bildirmiş, bu məsələlərlə məşğul olan qeyri-hökumət təşkilatlarının, müxtəlif cəmiyyətlərin, fondların fəaliyyəti barədə məlumat vermişdir. O, yeni yaranmış komitənin əsas fəaliyyət istiqamətlərindən birinin uşaq problemləri ilə bağlı olduğunu bildirmiş, uşaqların vəziyyətinin yaxşılaşdırılması üçün sıx əməkdaşlıq şəraitində işləməyin vacibliyini diqqətə çarpdırmışdır.

Yakob Eqbert BMT-nin Uşaq Hüquqları Komitəsi barədə məlumat vermiş, bu qurumun fəaliyyətində qeyri-hökumət təşkilatlarının rolunu yüksək dəyərləndirmişdir.

Görüşdə qeyri-hökumət təşkilatlarının nümayəndələrinə bu sahədə həyata keçirilən layihələr barədə məlumat vermiş, onları narahat edən məsələlərə aydınlıq gətirilmişdir.

Görüşdə mövzuya dair fikir mübadiləsi aparılmış, əməkdaşlığın perspektivləri müzakirə olunmuşdur.