BOLQARISTAN PREZİDENTİ GEORGİ PIRVANOVUN NİTQİ
Hörmətli xanım Əliyeva,
Xanımlar və cənablar!
Hörmətli cənab Prezident, ilk növbədə, nümayəndə heyətimizə qarşı göstərilən səmimi münasibətə və xoş qəbula görə Sizə öz təşəkkürümü bildirmək istərdim.
Dəvətinizi, Bolqarıstan Respublikasına qarşı dostluq münasibətinin göstərilməsini, qarşılıqlı surətdə faydalı əməkdaşlığın inkişaf etdirilməsinə hazır olmağınız kimi qəbul edirəm.
Dövlətlərarası münasibətlərin tarixi nisbətən qısadır, lakin xalqlararası əlaqələr uzaq keçmişdə də mövcud idi. Bolqarıstanda Nizami Gəncəvinin dahi yaradıcılığı ilə tanışdırlar. Onun “Leyli və Məcnun”, “Xosrov və Şirin” poemaları Azərbaycan və dünya ədəbiyyatının parlaq nümunələridir. Bolqarların əksəriyyətinə məlumdur ki, XII əsrdə Marağa şəhərində astronomik cədvəlləri ilə bütün Şərqdə və Avropada şöhrət qazanan rəsədxana mövcud idi. Ən müdrik şəxslərdən biri, ən zəngin kitabxanalardan birini toplayan Şah İsmayıl Xətai idi. Onun müdrikliyi qarşısında ehtiramla diz çökmək lazımdır. Bizim qonaqpərvər dostlarımız həmin zəngin mədəniyyətlə və öz tarixi irsi ilə ləyaqətlə fəxr edirlər.
Böyük İpək yolunun ayrılmaz hissəsi olan ölkələr olaraq, Avropa-Qafqaz-Asiya dəhlizinin reallaşdırılması vasitəsilə həmin yolun artıq yüksək keyfiyyətlə yeni əsasda bərpasında ümumi mənafelərimizi qeyd etmək istərdim.
Bu gün Bolqarıstan və Azərbaycanın coğrafi-siyasi mövqeyi çox vacibdir və bundan iki xalqın rifahı naminə birgə səylərlə istifadə etmək imkanımız var.
Azərbaycan Respublikası bizim üçün dost ölkə və vacib tərəfdaşdır. Dünyada siyasət və iqtisadiyyat sahəsində öz əhəmiyyətini artıran Azərbaycanı Qafqaz regionunda ən mühüm dövlət hesab etmək olar.
Bu gün Bolqarıstan Azərbaycan ilə Avratlantik inteqrasiyası yolunda müvəffəqiyyətlə əməkdaşlıq edir və həmin əməkdaşlıqla beynəlxalq terrorizmə, narkotrafikə və qanunsuz insan alverinə qarşı mübarizəyə qoşulurlar.
Bolqarıstan Respublikasının Azərbaycan Respublikası ilə ikitərəfli əməkdaşlığın fəal inkişafına marağını yenidən təsdiq etmək istərdim. Bolqarıstan Respublikasının Bakıdakı səfirliyinin açılması və bir neçə gün öncə Bolqarıstan Respublikasının fövqəladə və səlahiyyətli səfirinin təyin olunması niyyətimizin ciddiliyi və səmimiyyətinə, xalqlarımızın mədəniyyəti, tarixi və milli sərvətləri ilə daha da tam və yaxından tanış olmağa göstəriləcək səyləri iqtisadi maraqlarla uzlaşdırmaq istəyimizə sübutdur.
Hörmətli cənab Prezident!
Hörmətli xanımlar və cənablar!
Səfərimizin məzmunlu proqramı, eyni zamanda, səmərəli danışıqlar ticarət-iqtisadi və elmi-texniki sahədə əməkdaşlıq, mədəniyyət, elm və digər qarşılıqlı mübadilə sahələrində əlaqələrimizin məqsədyönlülüyünü əks etdirir.
Cənab Prezident, həmin danışıqların siyasi nəticələri bu gün Sizinlə imzalanmış Birgə Bəyannamədə öz əksini tapmışdır. Azərbaycana rəsmi səfərimizin əlaqələrimizə yeni impuls verəcəyinə və dövlətlər arasında olan dialoqu yeni mərhələyə gətirəcəyinə öz qəti inamımı yenidən ifadə etmək istərdim.
Fürsətdən istifadə edərək, Azərbaycan Respublikasının və dost Azərbaycan xalqının rifahı və əmin-amanlığı şərəfinə, Bolqarıstan-Azərbaycan münasibətlərinin gələcəyi şərəfinə, Azərbaycan Respublikasının Prezidenti zati-aliləri cənab İlham Əliyevin, hörmətli xanım Əliyevanın şərəfinə, bütün bu məclisdə iştirak edənlərin sağlığına badə qaldırmağı təklif edirəm.
X X X
Rəsmi qəbulda Milli Məclisin sədri Murtuz Ələsgərov, Baş nazir Artur Rasizadə, Prezident Administrasiyasının rəhbəri Ramiz Mehdiyev, deputatlar, nazirlər, xarici ölkələrin Azərbaycandakı səfirləri, ictimaiyyətin nümayəndələri iştirak edirdilər.
Bölmənin digər xəbərləri
